३० चैत,२०८२ वीरगञ्ज — वीरगञ्ज महानगरपालिका–९मा समूहगत कुटपिटबाट एक प्रहरी जवानको बीभत्स हत्या भएको छ।आइतबार दिउँसो भएको घटनामा विकास चौरसियाको ज्यान गएको हो। उनी सप्तरी दरबन्दी भई बिदामा घर आएका थिए।

सुदीपराज पाठकका अनुसार केही युवाहरूको समूहले चौरसियामाथि भारी वस्तु प्रहार गर्दै निर्घात कुटपिट गरेको सूचना पाएलगत्तै प्रहरी टोली घटनास्थल पुगेको थियो। गम्भीर घाइते अवस्थामा फेला परेका उनलाई तत्काल अस्पताल पुर्‍याइए पनि चिकित्सकले मृत घोषणा गरेका थिए।

घटनापछि प्रहरीले तीव्र अनुसन्धान अघि बढाउँदै घटनास्थलबाटै हत्यामा संलग्न रहेको आशंकामा चार जना युवालाई नियन्त्रणमा लिएको जनाएको छ। पक्राउ परेकाहरूको नाम तथा विवरण अनुसन्धान प्रभावित हुन सक्ने भन्दै सार्वजनिक गरिएको छैन।

प्रहरीले घटनाबारे थप अनुसन्धान जारी रहेको जनाएको छ।