१४ चैत,२०८२ काठमाडौं – नेपाली कांग्रेसले सरकार संयमित र परिपक्व ढंगले अघि नबढे देश पुनः द्वन्द्व र अस्थिरतातर्फ जानसक्ने चिन्ता व्यक्त गरेको छ। पूर्वप्रधानमन्त्री केपी शर्मा ओली र पूर्व गृहमन्त्री रमेश लेखकको पक्राउपछि शनिबार कांग्रेस प्रवक्ता देवराज चालिसेले पाँच बुँदे धारणा सार्वजनिक गर्दै सरकारलाई उत्तेजनामा नआउन आग्रह गरेका हुन्।

कांग्रेसले भदौ २३ र २४ गतेका घटनामा संलग्न व्यक्ति तथा संस्थामाथि निष्पक्ष, पारदर्शी र विधिसम्मत अनुसन्धान र कारबाही हुनुपर्ने स्पष्ट पारेको छ। साथै, ती दिन भएका आगजनी र विध्वंसमा को-को संलग्न थिए भन्ने कुरा जनताले थाहा पाउनुपर्ने उल्लेख गरिएको छ।

वक्तव्यमा दुवै दिनका घटनामा संलग्न जोसुकै भए पनि कानूनी प्रक्रिया अनुसार कारबाही हुनुपर्ने र त्यसमा पार्टीको सहयोग रहने जनाइएको छ। तर कारबाही आवेग वा उत्तेजनामा नभई विधि अनुसार हुनुपर्नेमा जोड दिइएको छ।

कांग्रेसले सरकार स्वयं संयमित नभए हतारमा गरिएका निर्णयले कानूनको शासन कमजोर हुने र देश पुनः अस्थिरतातर्फ धकेलिन सक्ने चेतावनी दिएको छ। साथै, यस विषयमा गम्भीर बन्न सरकारलाई आग्रह गरिएको छ।