२३ पुस,२०८२ काठमाडौं – धरान उपमहानगरपालिकाका मेयर हर्क साम्पाङले सुनसरी–१ बाट प्रतिनिधिसभा निर्वाचन लड्ने घोषणा गरेका छन्। श्रम संस्कृति पार्टीका अध्यक्षसमेत रहेका साम्पाङले सामाजिक सञ्जाल फेसबुकमार्फत धरान उपमहानगर रहेको क्षेत्रबाटै चुनाव लड्ने जानकारी दिएका हुन्। “म सुनसरी क्षेत्र नं. १ बाटै प्रतिनिधिसभाको चुनाव लड्नेछु,” उनले लेखेका छन्।

२०७९ सालको स्थानीय तह निर्वाचनमा स्वतन्त्र उम्मेदवारका रूपमा मेयर जितेका साम्पाङले केही समयअघि श्रम संस्कृति पार्टी गठन गरेका थिए। पार्टी गठनपछि देश दौडाहामा रहेका उनी खोटाङबाट चुनाव लड्न सक्ने अनुमान गरिएको थियो। तर उनले सो अनुमानलाई चिर्दै सुनसरी–१ बाटै उम्मेदवारी दिने स्पष्ट पारेका छन्।

सुनसरी–१ क्षेत्रमा धरान उपमहानगरपालिका सहित बाराहक्षेत्रका केही भाग र रामधुनी नगरपालिकाको एउटा वडा पर्दछ।