कात्तिक २०, २०८२ काठमाडौं— ए डिभिजन लिग स्थगित गर्ने निर्णयविरुद्ध खेलाडीहरूले सातदोबाटोस्थित अखिल नेपाल फुटबल संघ (एन्फा) मुख्यालयमा प्रदर्शन गरेका छन्। नेपाल फुटबल खेलाडी संघ (NFPA) को आयोजनामा खेलाडीहरूले बिहीबार एन्फा मुख्यालय पुगेर गेटमै आफ्नो जितका मेडल झुन्ड्याएका छन्।

खेलाडी संघका अध्यक्ष विक्रम लामाले अब एन्फाले आफैं आएर ती मेडल लिनुपर्ने बताएका छन्।
उनले भने, “अब यो मेडल एन्फाले आफैं आएर लाओस्, हामीले यहीँ छाडेर जान्छौं।”

संघका अनुसार खेलाडीहरू आफ्नो खेल्न पाउने आधारभूत अधिकारको संरक्षणका लागि सडकमा आउन बाध्य भएका हुन्।
खेलाडीहरूले पटक–पटक लिग स्थगित नगर्न आग्रह गरे पनि एन्फाले बेवास्ता गरेको कारण उनीहरू प्रदर्शनमा उत्रिएको बताएका छन्।

एन्फाले यस वर्ष पुस महिनामा राष्ट्रिय लिग गर्ने र अर्को वर्षको पुसमा मात्र ए डिभिजन लिग सुरु गर्ने निर्णय गरेको छ। यही निर्णयविरुद्ध खेलाडीहरूले असन्तुष्टि जनाएका हुन्।