कात्तिक १८, २०८२ काठमाडौं— नेपाली कांग्रेसका झन्डै ९ लाख क्रियाशील सदस्यमध्ये करिब ३ लाखले मात्र सदस्यता नवीकरण गरेका छन्। केन्द्रीय कार्यालयलाई ४६ जिल्लाबाट ३ लाख ९ हजार २५४ सदस्यताको विवरण प्राप्त भएको महामन्त्री गगन थापाले जानकारी दिए।

उनका अनुसार १९ जिल्लामा १ लाख १८ हजार ७९४ सदस्यता नवीकरण भइसकेको छ भने २७ जिल्लाबाट विवरण बुझाउने क्रम जारी छ। तर, डडेल्धुरा, सुर्खेत, नुवाकोट, कञ्चनपुर, रुपन्देही, धनुषा, बाँके र सिन्धुपाल्चोकलगायतका जिल्लामा नवीकरणमा समस्या देखिएको छ।

थापाका अनुसार आन्दोलन र आगजनीका कारण पर्सा, काभ्रे, मकवानपुर, बाँके, बर्दिया र कञ्चनपुरमा ढिलाइ भएको हो। उनले बाँकी जिल्लामा दुई साताभित्र नवीकरण पूरा हुने दाबी गरेका छन्।