काठमाडौँ । गत मंगलबारदेखि अवरुद्ध रहेको सार्वजनिक सवारी साधनको आवागमन शनिबारदेखि पुनः सुरु भएको छ। शुक्रबार फाट्टफुट्ट मात्रै चलेका सवारी साधन शनिबार बिहानैदेखि बाक्लो संख्यामा सञ्चालनमा आएका छन्।

चितवनतर्फबाट पनि बसहरू काठमाडौंका लागि प्रस्थान गरेका छन्। सोमबारको प्रदर्शनका क्रममा नयाँबानेश्वर वरपरबाहेकका क्षेत्रमा सवारी सञ्चालन भए पनि मंगलबारदेखि उपत्यकाभर प्रदर्शन तीव्र भएपछि सबै सवारी साधन ठप्प भएका थिए। नेपाली सेनाले कर्फ्यु लगाएको कारण पनि यातायात पूर्णरूपमा बन्द भएको थियो।

शनिबार बिहान कर्फ्यु हटाएसँगै जनजीवन सामान्य बन्दै गएको छ। सार्वजनिक बस, ट्याक्सीसहितका सवारी साधन बिहानैदेखि सञ्चालनमा आएपछि यात्रुहरूलाई सहज भएको छ।

यस्तै, जनजीवन सहज बन्दै गएपछि पसलहरू पनि खोलिन थालेका छन्। प्रदर्शनका क्रममा क्षति पुगेका पसलहरूमा व्यापारीहरूले बिहानैदेखि सरसफाइ सुरु गरेका छन्। मंगलबार रातिदेखि सडकमा सुरक्षा व्यवस्था कडा बनाउँदै आएको सेना शनिबार बिहानदेखि सडकबाट फिर्ता भएको छ।