भदौ २७,२०८२ काठमाडौँ – नेपाली सेनाले सामाजिक सञ्जालमार्फत् सेनालाई जोडेर गरिएका भ्रामक तथा झुट्टा प्रचारप्रति विश्वास नगर्न आम सर्वसाधारणलाई आग्रह गरेको छ ।

शुक्रबार बिहान जारी गरिएको विज्ञप्तिमा सेनाले हालको परिस्थितिमा सेनाबारे विभिन्न टिकाटिप्पणी, धारणा र विश्लेषणहरू सार्वजनिक भइरहेकाबारे उल्लेख गर्दै आफ्नो आधिकारिक सूचना नियमित रूपमा प्रेस विज्ञप्ति, प्रेस नोट र आधिकारिक सामाजिक सञ्जालमार्फत् मात्र प्रकाशित हुने स्पष्ट पारेको छ ।

विज्ञप्तिमा भनिएको छ, “तसर्थ, भ्रामक र झुट्टा समाचारहरूमा विश्वास नगर्न आम सर्वसाधारणहरूलाई नेपाली सेनाले आग्रह गर्दछ ।”

विहीबार साँझदेखि रातिसम्म सेनाको गतिविधिबारे अनेकौं हल्ला र अफवाह फैलिएको भन्दै सेनाले त्यसको प्रतिवाद स्वरूप यो स्पष्टिकरण जारी गरेको हो । साथै, विश्वसनीय सूचना आदानप्रदानका लागि पृतना हेडक्वार्टरहरूसँग प्रत्यक्ष सम्पर्क गर्न सकिने व्यवस्था गरिएको र सम्पर्क नम्बरहरू पनि सार्वजनिक गरिएको सेनाले जनाएको छ ।