असार ३१,२०८२ काठमाडौं । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले नेपालमा स्वदेशी तथा विदेशी लगानीकर्ताले ढुक्कसँग लगानी गर्नसक्ने वातावरण बनाउनुपर्नेमा जोड दिएका छन्।

काठमाडौंमा आयोजित इप्पानको २३औं वार्षिक साधारण सभामा बोल्दै उनले लगानी प्रक्रिया सरल, सहज र पारदर्शी हुनुपर्ने बताए। विद्युत खपत र व्यापार सरकारको दायित्व भए पनि निजी क्षेत्रको सहकार्य आवश्यक रहेको उनले स्पष्ट पारे।

सेयर निष्कासन रोकिएको विषयमा टिप्पणी गर्दै उनले प्रक्रिया अगाडि बढ्नुपर्ने अपेक्षा व्यक्त गरे। ऊर्जा क्षेत्रलाई प्राथमिकतामा राख्दै देउवाले हरित ऊर्जाबाट नेपाललाई लाभ उठाउन सकिने धारणा राखे। साथै, पछिल्लो आर्थिक–सामाजिक उपलब्धिहरू उदारवाद र निजीकरणको नीतिको परिणाम रहेको स्मरण गराए।