मोरङको इनरुवामा जन्मेका मनोज कुमार मेहता विगत डेढ वर्षदेखि माई पेको सीइओको रुपमा कार्यरत छन् । माई पेमा उनको संलग्नता, उनको नेतृत्वमा माई पेले चालेका कदमहरु र अरु वालेटहरुको भीडमा माई पेले कसरी आफूलाई उभ्याउने प्रयत्न गरिरहेको छ आदि सेरोफेरोमा रहेर मातृभूमिन्यूजका सम्पादक मनोजराज रेग्मीले उनीसँग गरेको प्रत्यक्ष अन्तर्वार्ताको सम्पादित अंश ।

माई पेको शुरुआत कहिलेदेखि भएको हो ?

हामीले लाइसेन्स प्राप्त गरेको पाँच वर्ष भैसक्यो । तर औपचारिक रुपमा गएको वर्ष मंसिरमा हामीले माई पे लन्च गरेका थियौं । हामीले डेढ वर्षको कार्यकाल तय गरिसकेका छौं ।

धेरै डिजिटल वालेटको माझमा माई पेले आफूलाई कसरी उभ्याएको छ र अरुले भन्दा कसरी भिन्न तरिकाले सेवा दिने सोंच्नु भएको छ ?

अहिले बजारमा हेर्दा धेरै डिजिटल वालेटहरु छन् । सबैले आ आफ्नो विशेषतालाई समातेर अगाडि बढेका छन् । हामीले अहिले ग्राहकहरुलाई आवश्यकता पर्ने आधारभूत सेवाहरु जस्तो टपअप, बिजुली तथा पानीको बिल तिर्ने सुविधा लगायत दैनिक जीवनमा उपयोग हुने सुविधाहरु राखिसकेका छौं । त्यसबाहेक पनि ग्राहकलाई चाहिने सेवाहरु हामीले थप्ने क्रममा छौं । अलिकता पृथक रुपमा आफूलाई उभ्याउन हामीले नयाँ प्रोडक्टहरु पनि समावेश गर्ने जमर्को गरेका छौं जसमा हामीले धेरै काम गरिसकेका छौं । मलाई लाग्दछ संभवत केही महिनाभित्र ग्राहक महानुभावहरुले आजसम्म उहाँहरुले अनुभव नगरेको कुराहरु हामीले प्रदान गर्नेछौं । यो बाहेक अरु दैनिक जीवनमा आवश्यक पर्ने क्यु आर नेटवर्कमा गएको महिनामा फोन पे नेटवर्कमा पनि आबद्ध भएका छौं जहाँबाट ग्राहकहरुलाई डेली पेमेन्ट गर्न ज्यादै सरल भएको छ ।

यसलाई स्थापित गराउन के कस्ता समस्याहरु झेलिरहनु भएको छ ?

समस्याहरु भनेको सबैभन्दा ठूलो भनेको सरकारबाट लागू भएको नियममा आबद्ध हुनुपर्ने हुन्छ । हामीलाई धेरै ठाउँमा नियमबद्ध भएर जानुपर्ने हुन्छ । अझ कुरा गर्नुपर्दा सर्भिस डिपेन्डीबिलीटी हुन्छ । मानौं हामीले फण्ड लोडको लागि बैंकमाथि भर पर्नुपर्ने, अरु फरक कुराको लागि तेश्रो पार्टीसँग भरपर्नु पर्ने जसले गर्दा हामीलाई स्थापना हुन केही समय लागिरहेको छ । अहिले हेर्नुभयो भने बैंकहरुसँग डिल गर्दै अझै सर्भिसहरु थप्ने क्रममै छौं । रेगुलेटरीको कुरा गर्दा राष्ट्र बैंक मात्र होइन कि अरु सरकारी निकायको कुरा गर्दा अझै पनि डिजीटल भुक्तानी लिन सबैजना तयारी अवस्थामा छैनन् । हामीले जस्तो सर्भिसहरु थपेर जाने जुन योजना गरेका थियौं त्यो अनुसार गर्न सकेका छैनौ ।

माई पेसँग कतिवटा बैंकहरु अहिले लिंक अप भएको छ ?

अहिले हामीसँग फण्ड लोडको लागि सबै बैंकहरु उपलब्ध छन् । लिंक बैंकमा चाहिं केही बैंकहरुलाई अहिले राखेका छौं र यसलाई वृद्धि गर्दै लाने योजना गरेका छौं । फण्ड लोड र बैंक ट्रान्सफरको लागि हामीसँग नेपालमा भएका सबैजसो बैंक र फाइनान्सियल संस्थाहरु उपलब्ध छन् । हामीले कोअपरेटिभसँग पनि कुरा गरिराखेका छौं । एक महिनाभित्र कोअपरेटिभलाई पनि जोड्नेछौं । हामीले बैंक ट्रान्सफर १ रुपैयाँमा गर्नुस् भनेर प्रवद्र्धन गरिराखेका छौं । १ रुपैयाँमा बैंकहरुमा ट्रान्सफर गर्ने फिचरलाई अहिले पनि निरन्तरता दिइरहेका छौं ।

माई पेका ग्राहकहरु कति जति छन् ?

यसको स्थापना पछि डेढ वर्षको अवधिमा हामीले ८ लाख ग्राहकहरु बनाइसकेका छौं र यसलाई ठूलै उपलब्धि मान्नुपर्दछ । यो निरन्तर वृद्धि हुने क्रममा छ । हामीले भएका ग्राहकहरुलाई कसरी राम्रो सेवा अझ दिने भन्ने कुरालाई मध्यनजर राखेर अगाडि बढीराखेका छौं ।

अरु वालेटभन्दा माई पे के कति कुरामा फरक छ ? किनकी अहिले इसेवा, आइएमई पे, खल्ती लगायतका धेरै वालेटहरु छन् ।

मैले अघि पनि भने नियमित सर्भिसहरु पहिल्यै नै उपलब्ध छन् । नेपाली बजारमा नै नभएका नवीनम सेवाहरुमा पनि हामीले काम गरिराखेका छौं । १ देखि डेढ महिना भित्रमा नेपाली बजारमा नभएका सर्भिसहरु थप गर्ने क्रममा छौं । यो भोलिको दिनमा सरप्राइजको रुपमा ग्राहकहरुले पाउनेछन् र मलाई आशा छ ग्राहकहरुले मन पनि पराउँछन् । त्यसबाहेक भएकै सेवामा पनि ग्राहकलाई बढी फाइदा कसरी हुन्छ चाहे त्यो क्यासब्याकबाट होस् वा कस्टमर सर्भिसबाट होस्, त्यो क्षेत्रबाट पनि हामीले कामहरु गरिराखेका छौं । अहिले अफरहरु हेर्नुभयो भने अरु वालेटभन्दा बढी रुपमा अफरहरु दिएर प्रमोट गरिराखेका छौं ।

अहिले सबैजसो बैंकको मोबाइल बैंकिगंहरु पनि छन् । यस्तोमा तपाईको वालेटले कस्तो किसिमको प्रतिष्पर्धाको सामना गर्नुभएको छ ?

अहिले हामी बैंकसँग प्रतिष्पर्धा गर्नुपर्ने अवस्थामा छौं किनभने बैंकले प्रदान गर्ने सेवा र हामीले प्रदान गर्ने सेवा मोटामोटी उस्तै उस्तै भन्न प-यो । मेरो बुझाईमा बैंकिगं एप नित्तान्त छुट्टै किसिमको एप हो । ग्राहकहरुले पनि बैंकको एपलाई भिन्न किसिमको एपको रुपमा लिनुपर्ने हुन्छ । बैंकले दिने सेवाहरु र हामीले दिने सेवाहरु छुट्टाछुट्टै नै हुन्छ । आजको दिनमा तपाईले हेर्नुभयो भने उदाहरणको लागि हामीले क्रिकेटको जुन एसीसी कप भैराखेको छ त्यसको टिकेट माई पेबाट काट्न पाइन्छ । त्यस्तै निश्चित इभेन्टको टिकट माई पे बाट गर्न मिल्दछ, रजिष्ट्रेशनहरु माई पेबाट गर्न मिल्दछ जुन चाहिं बैंकिकं एपमा उहाँहरुले गरिराख्नुभएको छैन । चुनौती त छ नै, किनभने सेग्मेन्ट एउटै हो, दुवै कस्टमरमा आधारित छन्, तर हामीले यसलाई बैंकिंक भन्दा छुट्टो तरिकाले यसलाई अगाडि बढाइरहेका छौं ।

माई पे प्रयोग गर्दा प्रयोगकर्तालाई के कस्ता फाइदाहरु छन् ?

मैले माई पे चलाउनुपर्दछ भनेर १०० प्रतिशत भन्दिन, मुख्य कुरा ग्राहकलाई फाइदा हुनुप¥यो । ग्राहकको रुपमा तपाईले सबै वालेटको क्यासब्याक र सुविधा तुलना गर्नुहोस्, तपाईलाई जुन फाइदाजनक हुन्छ त्यही प्रयोग गर्ने हो । हामीले १ रुपैयाँमा बैंक ट्रान्सफर गरिरहेका छौं जुन यो उद्योगमा सबैभन्दा कम हो । अरुले यो अफर गरेको छैन । तपाईले बैंक ट्रान्सफर गर्न माई पे प्रयोग गर्नुहोस् । त्यसबाहेक हामीले डाटा प्याक र भ्वाइस प्याकमा पनि १० प्रतिशत क्यासब्याक भनेर प्रमोट गरिराखेका छौं । १० प्रतिशत क्याशब्याक निकै उच्च नै हो । यसरी हामीले ग्राहकहरुलाई अफरहरु दिइरहेका छौं । त्यसगरी एयरलाइन्सको टिकटमा पनि अरुको भन्दा बढी क्याशब्याक दिइरहेका छौं । अरुहरुसँग तुलना गर्नुस् र माई पेमा आबद्ध भई क्यासब्याकको फाइदा उठाउनुस् ।

सुुरक्षाका कस्ता कस्ता थ्रेटहरु सामना गर्नुभएको छ ?

केही टेक्निकल थ्रेटहरु हुन्छन् । हाम्रोतर्फबाट गर्नुपर्ने सेक्युरिटी थ्रेट हाम्रो आन्तरिक टिम र विज्ञहरुबाट परिक्षण गराइसकेका हुन्छौं । ग्राहकलाई एपबाट लुपहोल हुने चान्स न्यून रहन्छ । प्रायः बजारमा हुने ठगीहरु ग्राहक आफै सचेत नभएर हुने ठगी हो । सबैभन्दा बढी त ओटीपी शेयर गर्ने हो । ठगी गर्ने मानिसहरुले विभिन्न बहानाले ओटीपी माग्दछन्, हामीले जानीनजानी अरुलाई ओटीपी शेयर गरेका हुन्छौं । अर्को चाहिं हामीले मोबाइल नम्बर परिवर्तन गरिसकेपछि त्यसलाई अपडेट गर्दैनौ । अरु थ्रेट भनेको अनावश्यक लिंकहरु क्लिक गर्ने, लोटरी प¥यो भन्ने जस्तो लोभमा पारेर यहाँ क्लिक गर्नुस् भनेर गरिने ठगी हुन् । थर्ड पार्टी लिंकहरु आउँछ त्यसलाई हामीले क्लिक गर्दा मोबाइलको डाटाहरु ह्याक हुने सम्भावना हुन्छ । त्यसैले ग्राहकहरु पनि आफै सचेत भएर रहनुपर्दछ ।

यसको प्रचार प्रसार तथा बजारीकरणको लागि के कस्ता उपायहरु अवलम्बन गर्नुभएको छ ?

हामीले हाम्रो मुख्य सम्पत्ति भनेको ग्राहकलाई मानेका छौं । हामीले ग्राहकलाई ध्यानमा राखेर मार्केटिङ गर्दछौं । उदाहरणको लागि हामीले ग्राहक केन्द्रित क्यासब्याकहरुमा बढी फोकस गरिरहेका छौं । ग्राहकको सेवालाई ध्यानमा राखेर हामीले काम गरिराखेका छौं । कुनै पनि ग्राहकको गुनासोहरु राम्रो गरी नियमन गर्नुपर्दछ । अहिले हाम्रो कस्टमर सर्भिस १८ घण्टाको छ । यसबाहेक हामीले युथलाई केन्द्रित गरेर अभियानहरु चलाइराखेका छौं । अहिले हामीले व्यापक रुपमा कलेजमा डिजीटल लिटरेसी गरिराखेका छौं । हामीले युथलाई टार्गेट गरेर इभेन्टहरु गरिराखेका छौं ।

भर्खरी आइसीसीको हामी टिकेटीङ पार्टनर भएका थियौं र यो पनि युथ केन्द्रित थियो । एसीसीको टिकेटीङ पनि माइ पेबाट भैराखेको छ । मार्केटिङ गर्दा युथहरुसँग कसरी जोडिने भनेर त्यसलाई केन्द्रित गरेर काम गरिराखेका छौं । अर्को कुरा सबैको ध्यान यो काठमाडौं भ्यालीमा भैराखेको छ । हामी काठमाडौं उपत्यका बाहिर पनि मुभ गर्ने योजना गरिराखेका छौं । हामी अहिले तयारी अवस्थामा छौं । ग्रामीण क्षेत्रहरु जहाँ अझ पनि डिजीटल एप भनेको के हो, जहाँ जागरुकता छैन, हामीले आउने महिनादेखि ग्रामीण भेगलाई प्रमोट गर्नेगरी योजना अगाडि सारेका छौं । हामी अहिले ७० प्लसको टीम छौं । हाम्रो भ्याली बाहिर विस्तार गर्ने योजना छ । अहिले हाम्रो शाखा कार्यालय छैन तर आउने समयमा आवश्यक परेमा खोल्नको लागि हामी तयारी अवस्थामा छौं ।

माई पेको आयको श्रोतको कुरा गर्दा हामी युटिलिटी पेमेन्टमा निर्भर छौं । अहिले हामी आय भन्दा पनि कस्टमरलाई कसरी बढी सेवा दिन सकिन्छ भन्ने कुरामा केन्द्रित भएर हिंडीराखेका छौं । कस्टमरलाई युटिलिटी सेल गर्दा सर्भिस प्रोभाइडरबाट केही कमीशन पाउँछौ, हाम्रो निश्चित मार्जिन हुन्छ । अहिले हामीले आयलाई बढाउनु भन्दा पनि आफ्नो तर्फबाट थपेर भएपनि हामीले ग्राहकलाई क्यास ब्याकहरु दिने र सर्भिस दिनेमा फोकस गरेका छौं ।