१२ माघ २०७९, काठमाडौँ: अमेरिकाका पूर्व राष्ट्रपति डोनाल्ड ट्रम्प फेरि एकपटक फेसबुक र इन्स्टाग्राममा देखिने भएका छन् । मेटाले घोषणा गरेको छ कि ट्रम्पको फेसबुक र इन्स्टाग्राम खाताहरू आगामी हप्ताहरूमा पुनर्स्थापित हुनेछन् । यसअघि पनि अमेरिकी पूर्व राष्ट्रपति डोनाल्ड ट्रम्प सामाजिक सञ्जाल फेसबुकमा फर्किन चाहेको खबर आएको थियो ।

डोनाल्ड ट्रम्पले पनि अनफू मेटासँग वार्तामा रहेको बताएका थिए । फेसबुकले दुई वर्षअघि डोनाल्ड ट्रम्पमाथि प्रतिबन्ध लगाएको थियो । जनवरी ६, २०२१ मा अमेरिकी संसदमा भएको आक्रमणपछि डोनाल्ड ट्रम्पलाई फेसबुकले प्रतिबन्ध लगाएको थियो ।

डोनाल्ड ट्रम्पले आफ्नो पोस्टमा दाबी गरे कि २०२० को राष्ट्रपति चुनावमा ठूलो मतदान धाँधली भएको थियो। त्यसलगत्तै फेसबुकले हिंसा भड्काएको आरोपमा डोनाल्ड ट्रम्पको खातामा प्रतिबन्ध लगाएको थियो । ट्विटरले पनि डोनाल्ड ट्रम्पलाई प्रतिबन्ध लगाएको छ । तर, इलोन मस्कले ट्विटर प्राप्त गरेपछि, डोनाल्ड ट्रम्पको खाता पुनः शुरु भएको थियो । यद्यपि ट्रम्पले अहिलेसम्म ट्वीट गरेका छैनन् ।