९ माघ २०७९, काठमाडौँ: संस्कृति, पर्यटन तथा नागरिक उड्डयन मन्त्री श्री सुदन किराती र राज्यमन्त्री श्री सुशीला सिर्पाली र श्रीमान सचिव सुरेश अधिकारीज्यूले आज नेपाल वायुसेवा निगमका बारेमा जानकारी लिनुका साथै आवश्यक निर्देशन समेत दिए ।

मन्त्री किरातीले अनलाइन टिकेटिङ्ग सुव्यवस्थित गर्न, लगेज सुरक्षित गर्न, समयमा विमान उडाउने क्रमलाई सक्रियतापूर्वक लागु गर्ने, थन्किएर रहेका विमानहरुको उचित प्रवन्ध मिलाउने र वित्तीय व्यवस्थापन सुधार गर्न निर्देशन व्यवस्थापनलाई दिनुभयो । उहाँले दुर्गम क्षेत्रका जनताले निगमप्रति सकारात्मक धारणा राखेका छन् भने त्यसै अनुसार सेवा प्रवाह गर्नुपर्ने बताए ।

उहाँले निगमको हितमा आफू निरन्तर सक्रिय रहने बताउँदै निगम व्यवस्थापन र कर्मचारीहरुबाट पनि त्यस्तै अपेक्षा गरेको उल्लेख गर्नुभयो । विगतमा निगम प्रतिको जनताको विश्वासलाई पुनजीर्वित गराउन र प्रतिष्ठा बृद्धि गर्न आफ्नो योग्यता, दक्षता र अनुभव प्रयोग गर्ने सुझाव दिए ।

राज्यमन्त्री सुशीला सिर्पालीले पर्यटन क्षेत्रका चुनौती र समस्याबारे गम्भीरतापूर्वक अध्ययन गर्न र देखिने चुनौती सामना गर्न वर्तमान सरकार लागिसकेको बताउनुभयो । उहाँले सरकारले निगमको विकासमा केही गर्ने दृढताका साथ अघि बढेको बताउँदै निगमले पनि असंभव केही छैन भन्ने विश्वासका साथ काम गर्न आव्हान गर्नुभयो ।

संस्कृति पर्यटन तथा नागरिक उड्डयन मन्त्रालयका सचिव श्री सुरेश अधिकारीले निगमको सेवा र व्यवसायिक कार्यलाई सन्तुलन मिलाई कामको गति अघि बढाउन आग्रह गर्नुभयो । उनले सामाजिक सेवाको योजनाका साथै व्यावसायिक एवं प्रशासनीक सुधारमा निगम सक्रिय रहनु पर्ने सल्लाह दिँदै ग्राउण्ड ह्याण्डलिङ सेवालाई अझ स्तरीय बनाउन निर्देशन दिए ।

निगमका कार्यकारी अध्यक्ष श्री युवराज अधिकारीले निगमका गतिविधिबारे विस्तृत विवरण प्रस्तुत गर्दै मन्त्रीज्यूको निर्देशन अनुसार कामहरु गरिने विश्वास दिलाउनु भयो । उनले निगमले १० वर्षे व्यावसायिक योजना ९२०२१–३०० लाई परिमार्जन गरी व्यावसायिक योजना ९२०२२–३१० तयार गरी संचालक समितिमा स्वीकृतिको लागि पेश गरिसकेको जानकारी गराए ।

निगमको कार्यकारी समितिले आन्तरिक बिफ्रिङ्गको क्रममा निगमको कार्यकारी अध्यक्षले माननीय मन्त्रीज्यू, राज्यमन्त्रीज्यू र श्रीमान सचिवज्यूलाई निगमसँग उपलब्ध जनशक्ति र साधनस्रोतको उचित व्यवस्थापनबाट निगमलाई सुदृढ गरिदै लगिने बताए । २२ वटाभन्दा बढि अन्तर्राष्ट्रिय वायुसेवा कम्पनीहरुसँग एसपीए गरी सकिएको र यसबाट अन्तर्राष्ट्रिय बिक्री प्रवद्र्धनमा गति बढाइएको पनि बताए । यसका साथै निगमको हालको आर्थिक अवस्था, दायित्व तथा भावी योजनाहरुका बारेमा पनि जानकारी गराइयो ।

उक्त अवसरमा निगममा उच्चपदाधिकारीहरुले आ–आफ्नो जिम्मेवारीबारे विस्तृत विवरण पेश गरेका थिए । नेपाल कर्मचारी युनियनका अध्यक्ष सुभाष डाँगी, नेपाल राष्ट्रिय कर्मचारी संगठनका अध्यक्ष राजु श्रेष्ठ, नेपाल राष्ट्रिय कर्मचारी संघका अध्यक्ष मानबहादुर कुँवर, नेपाल वायुसेवा निगम स्वतन्त्र कर्मचारी युनियनका कृष्ण बजगाँईले निगमका आवश्यकता, समस्या अवगत गराउँदै सहयोगबारे अपेक्षा व्यक्त गरे । उनीहरुले निगमको हितमा ट्रेड युनियनहरु निरन्तर सहयोगी रहेको बताए ।