१३ पुष, २०७९, काठमाडौँ: पाकिस्तानका पूर्वप्रधानमन्त्री इमरान खानमाथि भएकाे आक्रमणकाे छानबिन गरिरहेको संयुक्त अनुसन्धान समिति (जेआइटी) ले उनीविरुद्ध ‘सुनियोजित षड्यन्त्र’ भएको बताएको छ।

गत महिना इस्लामावादमा लङ मार्चमा रहेका इमरान खानमाथि आक्रमण भएको थियो। साेही क्रममा उनकाे दाहिने खुट्टामा गोली लागेको थियाे।

समाचार एजेन्सी पिटिआईका अनुसार जेआइटीको रिपोर्टलाई लिएर पाकिस्तानको पञ्जाब प्रान्तका आन्तरिकमन्त्री ओमर शरीफले खानमाथिको हमला ‘सुनियोजित षडयन्त्र’ भएको बताएका थिए।

उनले भने, ‘जेआइटीले आक्रमणमा एकभन्दा बढी आक्रमणकारी संलग्न रहेको पत्ता लगाएको छ। प्रहरीले मुख्य आरोपी मोहम्मद नावेदलाई पक्राउ गरेको छ। उनी जनवरी ३ सम्म जेआइटीको हिरासतमा रहनेछन्।’

शरीफले नावेद ‘प्रशिक्षित हत्यारा र आफ्नो सहयोगीसहित घटनास्थलमा रहेको’ बताएका छन्।