१४ असोज २०७९, काठमाडौं : आगामी मंसिर ४ गते हुने संघ र प्रदेशको निर्वाचनलाई लक्षित गरेर विभिन्न साना तीन दलबीच चुनावी सहकार्यको घोषणा भएको छ । यसरी सहकार्य गर्नेमा नेशनलिस्ट पिपल्स पार्टी, एकीकृत राष्ट्रवादी प्रजातान्त्रिक पार्टी र राष्ट्रिय यथार्थवादी पार्टी रहेका छन् । स्वतन्त्र वैकल्पिक एकता अभियानको पहल र नेश्नलिस्ट पिपल्स पार्टीको सहकार्यमा लाटोकोसेरो चुनावी अभियान घोषणा गरिएको छ ।

बिहीबार रिपोर्टर्स क्लब नेपालमा पत्रकार सम्मेलनको आयोजना गरेर उक्त अभियान घोषणा गरिएको जानकारी दिइएको हो । तीन वैकल्पिक धारका राजनीतिक दल नेशनलिस्ट पिपल्स पार्टी, एकीकृत राष्ट्रवादी प्रजातान्त्रिक पार्टी र राष्ट्रिय यथार्थवादी पार्टीले आउँदो मंसिर ४ को निर्वाचनमा लाटोकोसेरो चुनाव चिन्ह सहित चुनावी मैदानमा एक भई उत्रने प्रतिबद्धतासहित उक्त अभियानको घोषणा गरेका हुन् ।

देशलाई सुशासन र समृद्धि प्राप्त गर्न प्रणालीगत सुधारका लागि वैकल्पिक राजनीतिक शक्तिको उदय अनिवार्य भएको अभियानको ठहर छ । मुलुकमा आफन्तवाद, नातावाद, कृपावाद, गृहवाद र टुटफुटवाद बढ्दै गएको भन्दै यसको उचित व्यवस्थापन गरी सुशासन कायम गर्न वैकल्पिक राजनीतिक शक्तिको उदय निर्विकल्प बनेको अभियानले जनाएको छ ।अभियानले स्वतन्त्र र वैकल्पिक अभियन्ता तथा शक्तिहरुसँग पनि एकता गर्दै नेपालको राजनीतिमा सशक्त तेस्रो ध्रुव बन्दै पहिलो संसदीय दलको रूपमा स्थापित हुने दिशामा सहकार्यको लागि आह्वान गरेको छ ।

पत्रकार सम्मेलनमा बोल्दै एकिकृत राष्ट्रवादी प्रजातान्त्रिक पार्टीका संस्थापक अध्यक्ष त्रिलोक बहादुर चन्दले अहिलेका नेताहरुले देश लुटिरहेको भन्दै देश दोहनबाट रोक्न राष्ट्रवादी शक्तिहरु राष्ट्रिय एकतामा बाधिएको बताएका छन । नेपालका सबै क्षेत्रहरु लोकसेवा, सेना लगायत सबै ठोकसेवामा परिवर्तन भएको उनले आरोप लगाए । उनले नेपाली सेनाले ०५२ र ०५८ सालमा विद्रोहीहरुलाई समर्थन गर्नेलाई पनि संरक्षण गरेको टिप्पणी गरे । अहिले देशको अवस्थाबाट जनता आत्तिएको भन्दै उनले आगामी मंसिर ४ गते जनताले सहि निर्णय गर्ने विश्वास व्यक्त गरे । उनले आफ्नो पार्टीले सुदुरपश्चिमका ४४ क्षेत्रबाट उम्मेदवारी दिने बताए ।

राष्ट्रिय यर्थाथवादी नेपाल पार्टीका अध्यक्ष विष्णु कार्कीले देशको परिवर्तनका लागि एउटा पार्टीले मात्र केहीगर्न नसक्ने भएकोले एकतामा बाधिएको सुनाए । व्यक्तिको सिद्धान्तले नभई आवश्यकताको सिद्धान्तले सच्चा राजनीतिमा अघि बढ्नुपर्छ भनेर अभियान अगाडी बढेको उनले स्पष्ट पारे ।

उनले सम्पुर्ण राष्ट्रवादी शक्ति एक हुनुपर्ने अहिलेको आवश्यकता रहेको औंल्याए । दलका नेताहरुलाई जनताले रुचाउन छाडेको दाबी गर्दै उनले पछिल्लो अवस्थामा एक पार्टीले मात्र चुनाव जित्ने अवस्था नरहेको बताए । उनले योग्य उम्मेदवारहरुलाई सहयोग गर्न देशभरका मतदातालाई आग्रह गरे । कार्यक्रमममा डा. रणबहादुर चन्द, ईं डा. शंकर ढकाल, कान्तबहादुर पौडेल, ई। तेजनारायण यादव, ताराबहादुर कुँवर, मिना कटुवाल बुढाथोकी, यमकुमार बुर्जामगर, सुवाससिंह धामी, जानकी चन्दलगायतले आ–आफ्नो धारणा राखेका थिए ।