२५ कार्तिक, २०७८ काठमाडौँ :  नबिल बैंक र सहजबीच प्रदेश १ मा रहेका साना तथा मध्यम कृषि उद्यमलाई वित्तीय प्रवर्द्धन एवं सुदृढीकरणका लागि सम्झौता भएको छ।

आफ्ना ग्राहकहरुलाई गुणस्तरीय र नवीनतम बैंकिङ सेवा प्रदान गर्ने बैंकले स्विस कन्ट्याक्ट (प्रमुख एजेन्सीको रूपमा) र वातावरणीय तथा कृषि नीति अनुसन्धान, विस्तार र विकास केन्द्रद्वारा कार्यान्वयन गरिएको स्विस एजेन्सी फर डेभलपमेन्ट एण्ड कोअपरेसन (एसडीसी) परियोजना सहजबीच प्रदेश नम्बर १ मा वित्तीय समावेशीकरण वृद्धि गरी कृषि उद्यम प्रवर्द्धन गर्दै कृषि क्षेत्रको सुदृढीकरण गर्ने उद्देश्यले उक्त सम्झौता गरेको हो।

नबिल बैंकका प्रमुख कार्यकारी अधिकृत अनिलकेशरी शाह र स्विस कन्ट्याक्ट नेपालका कन्ट्री डाइरेक्टर सञ्जय कार्कीले एक समारोहबीच उक्त सम्झौतापत्रमा हस्ताक्षर गरेका छन्।

उक्त अवसरमा नबिलका प्रमुख कार्यकारी अधिकृत शाहले बैंकले सदैव वित्तीय समावेशीकरणलाई प्राथमिकता दिदै आएको र कृषि क्षेत्रमा गरिने कर्जा प्रवाहले नेपालको अर्थतन्त्रको दिगो विकासमा महत्वपूर्ण भूमिका निर्वाह गर्ने बताए।

स्विस कन्ट्याक्ट नेपालका कन्ट्री डाइरेक्टर कार्कीले जनता र समुदायको जीवनमा सुधार गर्ने दिगो अवसर सिर्जना गर्न एवं त्यसलाई आकार दिन निजी क्षेत्रका संस्थाहरू र सम्बन्धित सरोकारवालाहरूसँग साझेदारीमा स्विस कन्ट्याक्ट नेपालले विश्वास गर्ने बताए।

नबिल बैंकले समृद्ध र समावेशी कृषि क्षेत्रको विकास गर्न दिएको प्राथमिकतालाई आत्मसात गर्दै स्विस कन्ट्याक्ट नेपालको प्रमुख परियोजना सहजले बैंकलाई आफ्नो विद्यमान क्षमतामा सुधार गर्न र प्रदेश १ स्थित कृषि व्यवसायलाई नवीन सेवा तथा उत्पादनहरू प्रदान गर्नका लागि वित्तीय र प्राविधिक सहयोग उपलब्ध गराउन नबिल बैंकसँग साझेदारी गरेको हो।

नबिलका देशभर १३५ वटा शाखा, १८८ एटीएम, ७ एक्सटेन्सन काउन्टर र एकहजार ५०० भन्दा बढी रेमिट एजेन्टहरु रहेका छन्।