काठमाडौंः नेपाल कम्युनिष्ट पार्टी (नेकपा) का राष्ट्रियसभा सदस्य नारायणकाजी श्रेष्ठले कसैको व्यक्तिगत इच्छामा र स्वार्थका लागि संविधानमाथि कुठाराघात गर्न नहुने बताएका छन् ।

शुक्रबारको राष्ट्रियसभाको बैठकमा बोल्दै श्रेष्ठले प्रधानमन्त्री केपी शर्मा ओलीले यस्तो व्यक्तिगत स्वार्थका कारण यो कदम चालेको भन्दै संविधानमाथि कुठाराघात गर्न नहुने बताएका हुन् ।

उनले भने, ‘कसैले भन्न सक्छ यो संवैधानिक छ ? हामीले त्यतिबेला राष्ट्रिय राजनीतिक सहमति गरेका थियौं। यो सबैलाई थाहा छ। सबै जनतालाई थाहा छ। कानुन र संविधानको धारा अक्षर पढ्न सक्ने सबैलाई थाहा छ। तर यति हुँदाहुँदै पनि असंवैधानिक काम गरियो ।’

‘यो संवैधानिक भन्न कसैले सकेका छैनन्। तर हाम्रो प्रधानमन्त्री र उनका समर्थनले राजनीतिक बाध्यता भएको भन्दै संविधानमाथि आक्रमण गर्न पाउँदैनन, पार्टीमा एकता कायम गर्न छलफल भए पनि प्रधानमन्त्रीले गलत गर्दै गए।’ उनले भने ।

प्रधानमन्त्रीले पार्टीको आन्तरिक मामिलालाई हेरेर व्यक्तिको स्वार्थ हेरेर संविधानमाथि यस्तो गर्न नपाइने तर्क श्रेष्ठको छ ।