एजेन्सी, अष्ट्रेलियाबाट नेपाली लिएर नेपाल आउने चार्टर्ड उडान स्थगित भएको छ । अष्ट्रेलियाको सिड्नीबाट यही असार ३ गते हुने भनिएको ‘उद्धार’ उडान स्थगित भएको हो ।

दूतावासले सो दिनको उडान ‘प्राविधिक कारण’ले सम्भव नभएको भन्दै नयाँ मिति सार्वजनिक गरेको छ । दूतावासले जारी गरेको सूचना अनुसार अष्ट्रेलियाको सिड्नीबाट अब असार ९ गते (२३ जुन) मा पहिलो चार्टर्ड उडान हुने छ । यसैगरी दोस्रो चार्टर्ड उडान मेलबर्नबाट असार १२ गते (२६ जुन)मा हुने दूतावासले जारी गरेको सूचनामा उल्लेख छ ।

२ जुनसम्म नेपाल फर्कने फाराम भरेका नेपाली नागरिकहरुमध्ये नेपाल सरकारले तोकेको प्राथमिकताका आधारमा पहिलो र दोस्रो सूचीमा परेकाहरुलाई कन्फर्मसेनका लागि इमेल गरिसकिएको दूतावासले जनाएको छ । फाराम भरेका अन्य व्यक्तिहरुलाई पनि क्रमशः इमेल गरिने सूचनामा उल्लेख छ ।