बझाङ, बझाङमा चितुवाको छाला र हड्डी सहित दुई जना पक्राउ परेका छन् । जिल्लाको बुंगल नगरपालिका–११ का प्रेमबहादुर बोहरा र रमेश पातली चितुवाको छाला र हड्डी सहित पक्राउ परेका हुन् । मंगलबार राति एक बजेतिर सुदूरपश्चिम प्रदेश प्रहरी अनुसन्धान समूह र बित्थडचिर प्रहरी चौकीको टोलीले दुवैलाई पक्राउ गरेको हो ।

गोप्य सूचनाका आधारमा बोहराको घरमै बोरामा लुकाइराखिएका चितुवाका २२ वटा हड्डी र ८ फिट २ इन्च लम्बाइ तथा ५ फिट २ इन्च चौडाइको चितुवाको छाला बरामद गरिएको जिल्ला प्रहरी कार्यालयले जानकारी दिएको छ ।

पक्राउ परेका दुवै जनालाई बरामद सामग्रीसहित डिभिजन वन कार्यालयको जिम्मा लगाइएको तर, डिभिजनसँग हिरासत नभएकाले उनीहरूलाई प्रहरीकै हिरासतमा राखेर अनुसन्धान गरिने जिल्ला प्रहरी कार्यालयले जानकारी दिएको छ ।