वीरगन्ज । अपहरणपछि बालकको हत्या गर्ने दुई व्यक्तिलाई प्रहरीले गोली हानी नियन्त्रणमा लिएको छ । हत्या गरेको ठाउँ र शव सनाखतका लागि लगिएको उनीहरु भाग्न खोजेपछि प्रहरीले गोली हानेर नियन्त्रणमा लिएको हो ।

वीरगन्ज महानगरपालिका–३ प्रगति नगर निवासी शम्भु साहका ८ वर्षीय छोरा करण साहको गत १० जेठमा अपहरणपछि हत्या भएको थियो । विकास, सिकिन्दर र राम दिनेश महतोले बालकलाई अपहरणपछि बाराको खप्पर टाटा लगेर हत्या गरेका थिए । बालकको हत्याअघि उनीहरुले बालकको अडियो रेकर्ड गरेका थिए । त्यही रेकर्ड सुनाएर शम्भु साहसँग उनीहरुले फिरौती मागेका थिए ।

यो खबर सन्नासाथ प्रहरीले हत्या अभियोगमा भारतीय नागरिक विकास शर्मा र बाराका सिकिन्दरलाई पक्राउ गरेको थियो । घटनास्थल देखाउन लगिएका उनीहरु भाग्न खोजेपछि प्रहरीले गोली चलाएको हो । उनीहरुको अबस्था सामान्य रहेको जनाइएको छ ।