रुपन्देही । बुटवलस्थित लुम्बिनी प्रादेशिक अस्पतालमा पीसीआर मेसिन जडान गरी आजदेखि सञ्चालनमा आएको छ ।

मेसिन जडान भएसँगै प्रदेश नं ५ मा कोरोनाको परीक्षण तीव्र गतिमा बढ्ने अपेक्षा गरिएको छ । प्रदेश नं ५ सरकारका सामाजिक विकासमन्त्री सुदर्शन बरालले मेसिनको शुभारम्भ गर्दै प्राविधिक रुपमा गर्नुपर्ने काम अस्पताल र अस्पतालका कर्मचारीले गर्नुपर्ने तथा अस्पतालका लागि चाहिने आवश्यक स्रोतसाधन सरकारले जुटाउने बताए ।

बुटवल उपमहानगरपालिकाका प्रमुख शिवराज सुवेदीले कोरोना परीक्षण गर्न अस्पतालको स्तरोन्नतिका लागि पमहानगरपालिकाले हातेमालो गरेर अगाडि बढेको जानकारी दिए।

प्रयोगशालाविज्ञ पुष्पराज खनालले प्रयोगशालामा राज्यको लगानी धेरै हुन नसकेको अवस्थामा लुम्बिनी प्रादेशिक अस्पतालले शुरु गरेकोे पिसिआर परीक्षणले कोरोनाको निदानमा सघाउ पु¥याउने विश्वास गरे । अस्पतालका अध्यक्ष सूर्यबहादुर भट्टराईले मेसिन जडान भएपछि अब कोरोना परीक्षण शुरु गरिने बताए।

प्रादेशिक अस्पतालमा जडान गरिएको पिसिआर मेसिन रु एक करोड ३० लाखमा खरीदका लागि प्रदेश नं ५ सरकारले रु ६० लाख सहयोग गरेको छ भने बाँकी अस्पताल विकास समितिले लगानी गरेको छ । अस्पतालमा उपचारका लागि आउने बिरामीको परीक्षणका लागि मेसिन नहुँदा चिकित्सक र अस्पतालमा कार्यरत कर्मचारी जोखिममा थिए ।

मेसिन जडानपछि बिरामीको पीसीआर परीक्षण गर्न सकिने र उपचारका लागि ढुक्क होइन अस्पतालका मेडिकल सुपेरिटेण्डेन्ट डा राजेन्द्र खनालले बताए ।

अस्पतालमा जडान गरिएको मेसिनबाट अस्पतालमा उपचारका लागि आउने बिरामीको परीक्षणलाई पहिलो प्राथमिकता दिइने छ । यसका अलावा प्रदेश प्रयोगशालामा परीक्षण हुन बाँकी रहेका स्वाब परीक्षण गरिने डा खनालले बताए ।

अस्पतालको सुधारका लागि प्रयोगशालालाई अत्याधुनिक र स्तरीय बनाउन आवश्यक रहेकाले सोही कार्यमा लागेको अस्पतालका अध्यक्ष भट्टराईले बताए ।

कार्यक्रममा नेपाल कम्युनिष्ट पार्टी(नेकपा)का जिल्ला सचिव निर्मल जिसी, नेपाली कांग्रेसका विमलराज भट्टराई, नेपाल पत्रकार महासङ्घ प्रदेश उपाध्यक्ष भरत केसीलगायतले प्रयोगशाला सञ्चालनले कोरोना परीक्षण थप प्रभावकारी हुने विश्वास व्यक्त गरे ।