काठमाडौं । नेपाली कांग्रेसका सभापति गगनकुमार थापाले पार्टीको १५औँ महाधिवेशन खुलामञ्चमा आयोजना गर्नुका कारणबारे बताएका छन्।महाधिवेशनको उद्घाटन सत्रलाई सम्बोधन गर्दै थापाले खुलामञ्चमा आएपछि बीपी कोइरालाको पार्टीले केही सन्देश लिनुका साथै देशलाई पनि केही सन्देश दिनुपर्ने बताए। उनले महाधिवेशनलाई केवल नेतृत्व चयन गर्ने कार्यक्रमका रूपमा नलिन आग्रह गरे।

‘यो महाधिवेशन नेतृत्व चयन गर्ने इभेन्ट मात्रै होइन । खुलामञ्चमा आइसकेपछि बीपी कोइरालाको पार्टीले केही सन्देश लिनुपर्ने र दिनुपर्ने छ । केही संकल्प गर्नुपर्ने छ,’ थापाले भने। खुलामञ्चले फरक विचार र मत राख्ने व्यक्तिलाई एउटै सार्वजनिक ठाउँमा ल्याउने भूमिका खेल्ने उनले बताए। खुलामञ्चमा आएपछि मतभेद अन्त्य हुने नभई फरक मतलाई एउटै साझा मञ्चमा राख्ने अवसर मिल्ने उनको भनाइ थियो।

‘खुलामञ्चको एउटा विशेषता छ, यसले फरक मान्छेलाई एउटै सार्वजनिक ठाउँमा ल्याइदिन्छ । खुलामञ्चमा आएपछि मतभेद सकिन्छ भन्ने होइन । मतभेदलाई एउटै साझा मञ्चमा राख्ने ठाउँ हो खुलामञ्च,’ उनले भने। कांग्रेसले खुलामञ्चमा महाधिवेशन गरेर नेपालमा यस्ता खुला संवादका थलो धेरै ठाउँमा आवश्यक रहेको सन्देश दिन खोजेको थापाले बताए।

उनका अनुसार सबैभन्दा पहिले संसद्मै खुलामञ्च अर्थात् खुला संवादको वातावरण आवश्यक छ। संसद् खुला नभएको टिप्पणी गर्दै उनले प्रधानमन्त्रीले सबै सांसदको गरिमालाई सम्मान गर्दै संसद्मा उपस्थित भएर जनप्रतिनिधिका कुरा सुन्नुपर्ने बताए।‘पहिलो खुलामञ्च संसद्मा चाहिएको छ । संसद् खुला छैन । संसद् बन्द छ,’ थापाले भने। त्यस्तै, थापाले देशका समस्यालाई हल्का रूपमा लिन नहुने बताएका छन्। अहिलेका समस्या केवल नेपालका कारण सिर्जित नभएको भन्दै उनले विश्व राजनीतिमा भइरहेका घटनाक्रमको प्रभावसमेत नेपालमा परिरहेको बताए।

‘हाम्रो समस्याहरूलाई हल्का ढंगले– फेरि हिजो कसैले गर्दै गरेन, आज म आएको छु, छु मन्तर जसरी हल हुन्छ भनेर समस्याको हल पनि हुँदैन,’ उनले भने।रुस–युक्रेन युद्ध तथा मध्यपूर्वमा भइरहेको द्वन्द्वको प्रभावबाट नेपाल पनि अछुतो रहन नसक्ने उनको भनाइ थियो। विश्व राजनीतिले नेपाललाई कसरी प्रभावित गरिरहेको छ भन्ने विषयमा गम्भीर भएर सोच्नुपर्ने उनले बताए।

‘नेपालको समस्या नेपालको कारणले मात्रै पनि छैन । विश्व राजनीतिले हामीलाई कसरी गाँजेको छ हामीले हेर्नुपर्दैन ? रुस र युक्रेनको युद्धको प्रभाव नेपाललाई परेको छैन ? मध्यपूर्वमा जे भइरहेको छ त्यसको प्रभावबाट नेपाल मुक्त हुन सक्छ ?’ उनले प्रश्न गरे।