१८ असोज २०८३ पोखरा — सत्तारुढ दल राष्ट्रिय स्वतन्त्र पार्टी (रास्वपा)का सभापति रवि लामिछानेले बालेन शाह नेतृत्वको सरकार नढल्ने दाबी गरेका छन्। नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै लामिछानेले सरकार ढल्छ–ढल्छ भनेर चर्चा गर्नेहरू नै सरकार नढलेको देखेर बेहोस भएर ढल्ने टिप्पणी गरे।

‘कहिलेकाहीँ सुनिन्छ, सरकार कमजोर भयो, सरकार ढल्छ, अहिल्यै ढल्छ, भोलि ढल्छ, दशैंमा ढल्छ, तिहारमा ढल्छ, छठमा ढल्छ, नेपाल संवतमा ढल्छ, ढल्छ कि ढल्छ भनेको सुन्छु,’ उनले भने, ‘ढल्न त ढल्छ, तर यो पटक–पटक सरकार ढल्छ भन्ने मान्छे सरकार नढलेको देखेर बेहोस भएर ढल्छ।’

लामिछानेले यसपटक व्यक्तिलाई मात्र छनोट नगरी इतिहास बदल्ने उद्देश्यले सरकार चुनेको बताए। उनले जनमतको हुर्मत लिने काम नगर्न पनि सबैलाई आग्रह गरे। उनले जनताको मतको सम्मान गर्दै सरकारलाई काम गर्ने वातावरण बनाउनुपर्नेमा जोड दिए।