१६ असोज २०८३ काठमाडौं —  प्राविधिक शिक्षा तथा व्यावसायिक तालिम परिषद् (सीटीईभीटी)को सदस्य सचिवमा प्रमोदभक्त आचार्य नियुक्त भएका छन्। नेपाल सरकार, मन्त्रिपरिषद्को निर्णयअनुसार तनहुँका आचार्यलाई सीटीईभीटीको सदस्य सचिवको जिम्मेवारी दिइएको हो।

तनहुँको भानु नगरपालिका–४, चुँदीमा जन्मिएका आचार्य लामो समयदेखि सीटीईभीटीमा कार्यरत छन्। परिषद्का विभिन्न शाखा तथा महाशाखामा जिम्मेवारी सम्हालेका आचार्यसँग प्रशासनिक तथा प्राविधिक शिक्षा व्यवस्थापनको क्षेत्रमा अनुभव छ।

उनी यसअघि सीटीईभीटीका सहसचिवका रूपमा कार्यरत थिए। त्यस्तै, आचार्यले सीटीईभीटी गण्डकी प्रदेश कार्यालयको निर्देशकको जिम्मेवारीसमेत सम्हालिसकेका छन्। परिषद्को सांगठनिक व्यवस्थापन, प्राविधिक शिक्षा तथा व्यावसायिक तालिम सञ्चालन र संस्थागत कार्यसम्पादनका क्षेत्रमा आचार्यले काम गर्दै आएका छन्।

सीटीईभीटीले प्राविधिक तथा व्यावसायिक शिक्षा र सीपमूलक तालिममार्फत दक्ष जनशक्ति उत्पादन गर्दै आएको छ। आचार्यको नियुक्तिसँगै प्राविधिक शिक्षाको गुणस्तर सुधार, सीपयुक्त जनशक्ति उत्पादन तथा तालिमलाई रोजगारीसँग जोड्ने विषयमा थप काम हुने अपेक्षा गरिएको छ।