८ असोज २०८३ काठमाडौं — नेपाल राष्ट्र बैंकले नयाँ डिजाइन र सुरक्षा विशेषतासहित १ हजार रुपैयाँ दरको बैंकनोट चलनचल्तीमा ल्याउने भएको छ। बैंकले ‘सिरिज २०२५’ को १ हजार रुपैयाँको नोट साविककै आकारमा तर नयाँ रंग र सुरक्षा विशेषतासहित प्रचलनमा ल्याउन लागेको हो।

नयाँ नोटको मुख्य रंग बैजनी घेराभित्र फिक्का हरियो रहेको छ। अगाडिको भागमा सगरमाथाको चित्र, लालीगुराँसको पानीछाप र पानीछापमा १ हजार अंक राखिएको छ। दृष्टिविहीन व्यक्तिले सहजै पहिचान गर्न सक्ने गरी रोमन अक्षर ‘एम’ तथा तेर्सा रेखासमेत राखिएका छन्।

नोटमा सीधा हेर्दा सुनौलो र ढल्काएर हेर्दा हरियो देखिने विशेष सुरक्षा विशेषता तथा ३.५ मिलिमिटर चौडाइको सुरक्षा धागो प्रयोग गरिएको छ। सुरक्षा धागोमा ‘एनआरबी’ र ‘१०००’ अंक राखिएको छ। नयाँ नोटमा नेपाल राष्ट्र बैंकका गभर्नर प्रा. डा. विश्वनाथ पौडेलको दस्तखतसमेत रहेको छ।

नोटको पछाडिको भागमा चितवनको सरकारी हात्तीसारमा रहेका दुर्लभ जुम्ल्याहा हात्ती राम र लक्ष्मणको चित्र राखिएको छ। साथै, सातवटै प्रदेशलाई जनाउने सातवटा लालीगुराँसका चित्र र हनुमानढोकास्थित ल्हाँचोकमा रहेको ऐतिहासिक थामको आकृति राखिएको छ।

राष्ट्र बैंकका अनुसार यसअघि सिरिज २०१९ को १ हजार रुपैयाँका नोट सीमित संख्यामा मात्र चलनचल्तीमा ल्याइएको थियो। नयाँ सिरिजको नोट भने यसअघि प्रयोगमा नआएको क्रमबाट सुरु गरिएको हो। नयाँ नोट प्रचलनमा आए पनि १ हजार रुपैयाँ दरका अन्य नोटहरू कानुनी रूपमा चलनचल्तीमै रहने राष्ट्र बैंकले जनाएको छ।