काठमाडौं । संयुक्त राज्य अमेरिकाले भोटेकोशी र त्रिशूली नदीमा आएको विनाशकारी बाढीबाट प्रभावित नेपाललाई थप ४ अर्ब ६५ करोड रुपैयाँ सहयोग गर्ने भएको छ।

बाढीपछि राहत तथा पुनर्स्थापनाका लागि आवश्यक सहयोग उपलब्ध गराउन अमेरिका तयार रहेको जनाएको हो। यसअघि पनि अमेरिकाले राहत सामग्री, प्राविधिक सहयोग तथा करिब ७५ करोड रुपैयाँ बराबरको सहायता उपलब्ध गराएको थियो।

थप सहयोगबाट क्षतिग्रस्त भौतिक पूर्वाधार पुनर्निर्माण, खानेपानी तथा सरसफाइ र विपद् उद्धार तथा पुनरुत्थानका काममा सहयोग पुग्ने बताइएको छ। भविष्यका विपद् व्यवस्थापनका लागि ड्रोन खरिदमा समेत सहयोग उपयोग गरिने जनाइएको छ।

न्युयोर्कमा परराष्ट्रमन्त्री शिशिर खनालसँगको भेटमा अमेरिकी राजनीतिक मामिलाकी उपविदेशमन्त्री एलिसन हुकरले थप सहयोगबारे जानकारी गराएकी हुन्।