१२ भदौ २०८३ काठमाडौं – रसुवा बाढीमा बगेर चितवनमा भेटिएका शवको संख्या बढ्दै गएपछि भरतपुर अस्पतालमा शव व्यवस्थापनमा समस्या भएको छ। अस्पतालका प्रमुख मेडिकल सुपरिन्टेन्डेन्ट डा. विश्वबन्धु बगालेका अनुसार बिहीबारसम्म १३७ शव अस्पतालमा ल्याइएकोमा शुक्रबार थप ५० शव आएका छन्। शुक्रबार साँझसम्म शवको संख्या करिब २०० पुग्न सक्ने अनुमान छ।

शव परीक्षणका लागि चारवटा फरेन्सिक टोली निरन्तर खटिएका छन्। अस्पतालमा २४ वटा मात्रै फ्रिजर रहेकाले थप शव करिडोर तथा बाहिरी क्षेत्रमा त्रिपाल लगाएर राख्नुपरेको छ। तापक्रम व्यवस्थापन गर्न नसक्दा केही शव कुहिन थालेका छन्।

अस्पतालले पहिचान हुन सक्ने सग्ला शवलाई प्राथमिकता दिँदै पोस्टमार्टम, फिंगरप्रिन्ट तथा अन्य पहिचानसम्बन्धी विवरण संकलन गरिरहेको जनाएको छ।