१५ साउन २०८३ काठमाडौं – गृह मन्त्रालयले मधेश र कोशी प्रदेशका विभिन्न जिल्लामा सुरक्षा निगरानी थप कडा बनाएको छ। संवेदनशील क्षेत्रमा ड्रोनमार्फत निगरानीसमेत तीव्र पारिएको मन्त्रालयले जनाएको छ। मन्त्रालयका अनुसार सामाजिक सद्भाव र धार्मिक सहिष्णुतामा खलल पुर्‍याउने, अफवाह फैलाउने वा कानुनविपरीत गतिविधिमा संलग्न जो–कोहीमाथि प्रमाणका आधारमा कानुनी कारबाही गरिनेछ।

प्रशासनले नागरिकलाई भ्रामक सूचना र उक्साहटमा नलाग्न तथा शान्ति, संयमता र सामाजिक सद्भाव कायम राख्न आग्रह गरेको छ। सुनसरीबाट सुरु भएको तनाव मधेशका विभिन्न जिल्लामा फैलिन थालेको छ। साउन १० यता सुनसरीमा दुई जना र सिराहामा एक जनाको गोली लागेर मृत्यु भइसकेको छ।