१० फाल्गुन, २०८२ डोल्पा- यही फागुन २१ गते हुने प्रतिनिधि सभा निर्वाचनका लागि डोल्पामा आवश्यक निर्वाचन सामग्री आइतबार नेपाली सेनाको स्काई ट्रकमार्फत पुगेको छ।

निर्वाचन अधिकृत कृष्ण बहादुर रावतका अनुसार सुरक्षा सिल, मसीका मार्कर, स्वस्तिक छाप, स्टिकर र रंगिन मतदाता नामावली जिल्ला पुगेको छ। मतपेटिका भने जिल्लामै सुरक्षित रहेको छ।

डोल्पामा एउटा मात्रै निर्वाचन क्षेत्र रहेको छ जहाँ ११,९२८ पुरुष र १२,१८७ महिला गरी कुल २४,११५ मतदाता रहेका छन्। जिल्लामा दुई अस्थायी सहित ७० मतदान केन्द्र र निर्वाचनका लागि ४१४ कर्मचारी खटाइएको मुख्य निर्वाचन कार्यालयले जनाएको छ।