मंसिर २८,२०८२ काठमाडौं— नेकपा एमालेले विरोधका बीच विधान महाधिवेशनले ल्याएको निर्णय उल्ट्याउँदै पदाधिकारी र स्थायी कमिटीको संख्या पुरानै कायम गरेको छ। अध्यक्ष केपी शर्मा ओलीको प्रस्तावअनुसार अध्यक्ष १, वरिष्ठ उपाध्यक्ष १, उपाध्यक्ष ६, महासचिव १, उपमहासचिव ३ र सचिव ७ गरी पदाधिकारी बनाइए। ४५ सदस्यीय स्थायी कमिटी र ९९ सदस्यीय पोलिटव्युरोसहित केन्द्रीय कमिटी ३०१ सदस्यीय बनेको छ।

गत भदौको विधान महाधिवेशनले पदाधिकारी संख्या १५ र स्थायी कमिटी नराख्ने निर्णय गरेको थियो। यसलाई फेरि संशोधन गर्नुको विरोध एमाले भित्र देखा परेको छ। वरिष्ठ उपाध्यक्ष ईश्वर पोखरेलले संख्या बढाउँदा पार्टीको क्षमता बढ्ने ग्यारेन्टी नभएको टिप्पणी गरेका छन्।