काठमाडौं – काठमाडौं महानगरपालिकाका मेयर बालेन्द्र शाह (बालेन) ले उग्र प्रदर्शनमा रहेका जेनजीहरूलाई नेपाली सेनासँग वार्तामा बस्न तयार रहन आग्रह गरेका छन्। बालेनले सोमबार सामाजिक सञ्जाल फेसबुकमार्फत आफ्नो भनाइ सार्वजनिक गर्दै भनेका छन्, “सेना प्रमुखसँग वार्ता गर्न पनि तयार हुनुहोला।”

तर, उनले वार्ताको पूर्वशर्त पनि राखेका छन्। उनका अनुसार संसद् विघटन भइसकेपछि मात्र सेनासँग संवाद सम्भव हुने बताउँदै उनले थपे, “याद रहोस् — वार्ता गर्नु अघि संसद् विघटन भएको हुनु पर्छ।”

यस्तै, जेनजीहरूको आन्दोलन चर्किएसँगै राजनीतिक परिस्थिति थप जटिल बन्दै गएको छ। आन्दोलन उग्र भएपछि प्रधानमन्त्री केपी शर्मा ओलीले आजै राजीनामा दिएका छन्। स्रोतका अनुसार अब आन्दोलनकारी र राज्यपक्षबीच वार्ता प्रक्रियामा सेना प्रमुखको भूमिका महत्वपूर्ण बन्न सक्ने देखिएको छ।