बुटवल । अन्ततः प्रदेश ५ को लोकसेवा आयोगको मुकाम बुटवलमा तोकिएको छ । प्रदेश मन्त्रिपरिषदको मंगलबार बसेको बैठकले लोकसेवा आयोगको मुकाम बुटवलमा राख्ने निर्णय गरेको हो ।

प्रदेश ५ को स्थायी राजधानी हालसम्म नतोकिए पनि प्रदेश ५ को लोकसेवा आयोगको मुकाम बुटवलमा रहने भएको छ । स्थायी राजधानी दाङ वा बुटवल रहने भन्ने अहिले पनि विवाद छ ।

यस्तै, मन्त्रिपरिषद बैठकले पेन्सन प्राप्त स्थानीय तहका जनप्रतिनिधिले दोहोरो सुविधा पाउने गरी स्थानीय तहका पदाधिकारी तथा सदस्यहरुको सुविधासम्बन्धी ऐन, २०७५ संशोधन गर्ने विधेयकलाई सैद्धान्तिक स्वीकृति दिएको छ ।

बैठकले सडक दुर्घटनामा परी ज्यान गुमाएका प्रदेशसभा सदस्य उत्तरकुमार वलीको परिवारलाई प्रदेशसभा सचिवालयमार्फत बीमावापतको १० लाख रुपैयाँ उपलब्ध गराउने निर्णय गरेको सरकारका प्रवक्ता बैजनाथ चौधरीले बताए ।

बैठकले सामाजिक विकास मन्त्रालयले पेश गरेको सेवा केन्द्र तथा पुनर्स्थापना केन्द्र स्थापना र सञ्चालन तथा सेवा तथा पुनर्स्थापना कोष सम्बन्धमा व्यवस्था गर्न बनेको विधेयक २०७६ सम्बन्धमा तयार गरिएको अवधारणा पत्रलाई पनि सैद्धान्तिक स्वीकृति प्रदान गरेको छ ।

यसैगरी बैठकले उद्योग, पर्यटन, वन तथा वातावरण मन्त्रालयले पेश गरेको वजार नियमन तथा प्रतिस्पर्धा प्रवर्द्धन गर्ने सम्बन्धमा व्यवस्था गर्न बनेको विधेयकको अवधारणा पत्र स्वीकृत गरेको छ ।

त्यस्तै प्रदेश विश्वविद्यालय स्थापना र प्रदेश अन्तर्गत सञ्चालन हुने उच्च शिक्षासम्बन्धी शैक्षिक संस्थाहरुको नियमन गर्न उच्च शिक्षा नीति सम्बन्धमा बन्ने विधेयकको बारेमा तयार पारिएको अवधारणा पत्रलाई पनि मन्त्रिपरिषदले स्वीकृति दिएको छ ।

प्रदेश सरकारले व्यवसायिक तथा सीप विकास तालिम केन्द्र बाँके र दाङ तथा रोजगार सूचना केन्द्र बुटवलमा कार्यरत अस्थायी कर्मचारीहरुको सेवा अन्त्य गर्ने निर्णय पनि गरेको छ भने कपिलवस्तुको शुद्धोधन गाउँपालिकाको केन्द्र परिवर्तन गर्न संघीय सरकारलाई सिफारिस गर्ने निर्णय पनि गरेको छ ।