काठमाडौं, विवाहका लागि महिलाको उमेर २० वर्षबाट घटाएर १८ वर्ष कायम गर्न सांसदहरुले सुझाव दिएका छन् ।

बुधबारको बसेको प्रतिनिधिसभाको बैठकमा महिला, बालबालिका तथा ज्येष्ठ नागरिकमन्त्री थममाया थापासँगको मौखिक प्रश्नोत्तरमा सांसदहरु प्रेम सुवाल, देवेन्द्र पौडेल, रामकुमारी झाँक्रीलगायतले प्रश्न गर्दै यस्तो सुझाव दिएका हुन् ।

उनीहरुले मुलुकी फौजदारी (संहिता) ऐन २०७४ ले विवाह गर्ने उमेर २० वर्ष तोके पनि नेपालमा त्योभन्दाअघि नै विवाह गर्ने चलन रहेकाले कानुन संशोधन गरेर व्यावहारिक बनाउन सुझाव दिए ।

जवाफमा मन्त्री थापाले अन्तर्राष्ट्रिय कानुनअनुसार र बालविवाह रोक्नका लागि २० वर्ष उमेर राखिएको भन्दै कानुनलाई प्रभावकारी बनाउन छलफल गर्नसकिने बताइन् ।