१४ भदौ २०८३  धादिङ — त्रिशूली नदीमा आएको भीषण बाढीले गोरखा र धादिङ जोड्ने चरौँदीस्थित झोलुङ्गे पुल बगाएको छ। आइतबार बिहान आएको ठूलो बाढीले गोरखाको गण्डकी गाउँपालिका र धादिङको बेनीघाट रोराङ गाउँपालिका जोड्ने चरौँदी झोलुङ्गे पुल बगाएको हो।

जिल्ला प्रहरी कार्यालय धादिङका अनुसार बाढीको तीव्र बहावका कारण उक्त पुल चुँडिएर बग्दा ठूलो क्षति पुगेको छ। यसैगरी, बाढीले त्रिशूली नदीमाथि धवादी क्षेत्रमा रहेको अर्को झोलुङ्गे पुलमा समेत क्षति पुर्‍याएको प्रहरीले जनाएको छ।

गण्डकी गाउँपालिकाकी उपाध्यक्ष ललिता अधिकारीका अनुसार नदीमा आएको बाढीको तीव्रता अत्यधिक रहेकाले झोलुङ्गे पुल बग्ने अवस्था सिर्जना भएको थियो। बाढीका कारण नदी आसपासका क्षेत्रमा उच्च सतर्कता अपनाउन स्थानीयलाई आग्रह गरिएको छ।