काठमाडौँ । ब्याजदर इतिहासकै न्यून बिन्दुमा झर्दासमेत नेपालमा कर्जाको माग बढ्न सकेको छैन। नबिल बैंकका सीईओ मनोज ज्ञवालीका अनुसार बैंकिङ प्रणालीमा अहिले करिब १३ खर्ब ५० अर्बदेखि १४ खर्ब रुपैयाँसम्म निक्षेप सरप्लस छ।

असार मसान्तयता मात्रै कर्जा प्रवाह ३० अर्ब रुपैयाँले घटेको उनले बताए। रेमिट्यान्स बढे पनि उपभोग र निजी क्षेत्रको आत्मविश्वास घट्दा कर्जाको माग कमजोर भएको उनको भनाइ छ।

ज्ञवालीले निजी क्षेत्रको विश्वास बढाउन सरकारले पहल गर्नुपर्ने तथा व्यावसायिक गल्ती र वित्तीय अपराधलाई छुट्टाछुट्टै रूपमा हेर्नुपर्नेमा जोड दिए।