सिरहा । सिरहाको लहानमा दुई पक्षबीच भएको झडपमा एक जनाको मृत्यु भएको छ। जिल्ला प्रशासन कार्यालय सिरहाका सहायक प्रमुख जिल्ला अधिकारी चेतराज बरालका अनुसार झडपमा करिब २० वर्षीय गणेश यादवको मृत्यु भएको हो।

बिहीबार मध्याह्न गोलबजार क्षेत्रमा भएको झडपमा अर्का एक जना घाइते भएका छन्। घटनापछि सुरक्षा अवस्था तनावपूर्ण बनेसँगै स्थानीय प्रशासनले गोलबजार क्षेत्रमा कर्फ्यू आदेश जारी गरेको छ।

प्रदर्शनका क्रममा उग्र बनेका प्रदर्शनकारीले एक ग्यारेजबाट मोटरसाइकल निकालेर आगजनी गरेका थिए। आगलागीबाट ११ वटा मोटरसाइकल पूर्ण रूपमा नष्ट भएको प्रहरीले जनाएको छ।

सुनसरीमा भएको साम्प्रदायिक तनावको प्रभाव सिरहासम्म फैलिएको अवस्थामा जिल्लामा सुरक्षा व्यवस्था कडा पारिएको छ। स्थानीय प्रशासनले नागरिकलाई कर्फ्यू आदेशको पालना गर्न र अफवाहमा विश्वास नगर्न आग्रह गरेको छ।