७ जेठ २०८३ काठमाडौं – हर्क साम्पाङ ले प्रधानमन्त्री बालेन्द्र शाहले आफ्नो कर्तव्य पूरा गर्न नसके मार्ग प्रशस्त गर्नुपर्ने बताएका छन् । बिहीबार प्रतिनिधिसभा बैठक सुरु हुनेबित्तिकै प्लेकार्डसहित विरोध जनाएपछि सभामुख डोलप्रसाद अर्यालले उनलाई बोल्न समय दिएका थिए ।

सांसद साम्पाङले संसद् नियमावलीअनुसार सांसदले उठाएका प्रश्नको जवाफ ७ दिनभित्र दिनुपर्ने भए पनि आफूहरूले उठाएका प्रश्नको जवाफ अझै नआएको बताए । उनले लिपुलेक सीमा र सुरक्षासम्बन्धी विषयमा गृहमन्त्री र रक्षामन्त्रीको जिम्मेवारी प्रधानमन्त्रीले नै सम्हालेकाले प्रधानमन्त्री स्वयंले सदनमा आएर जवाफ दिनुपर्ने माग गरे ।

उनी जेठ ४ गतेदेखि लगातार प्रतिनिधिसभामा प्लेकार्डसहित विरोध जनाउँदै आएका छन् ।