११ फाल्गुन, २०८२  काठमाडौं – धादिङको बेनिघाट रोराङ गाउँपालिका–५ भंसेगौडामा गएराति बस दुर्घटना हुँदा १९ जनाको मृत्यु र २५ जना घाइते भएका घटनाको समीक्षा गर्न गृहमन्त्री ओमप्रकाश अर्यालको अध्यक्षतामा उच्चस्तरीय बैठक बसेको छ।

बैठकले घाइतेको शीघ्र उपचार, दुर्घटनाको सत्यतथ्य पत्ता लगाउन जाँचबुझ समिति गठन र प्रतिवेदन यथाशीघ्र कार्यान्वयन गर्ने निर्णय गरेको छ। यातायात क्षेत्रको नियमन प्रभावकारी बनाउँदै बस व्यवसायी, चालक र सहचालकलाई जिम्मेवार बनाउने, सडक सुरक्षा कडा गर्ने र दोषीलाई कानुनी दायरामा ल्याउने निर्णय पनि बैठकले गरेको छ।

मन्त्री अर्यालले भने, “सडक र नागरिकको सुरक्षामा हेलचेक्र्याइँ हुँदैन, कसैलाई दण्डहीनता क्षम्य हुनेछैन।” दुर्घटनाको समयमा सुरक्षित यातायात व्यवस्थापन र निर्वाचन सुरक्षा चुस्त बनाउन सबै सरोकारवालालाई सक्रिय हुन बैठकले निर्देशन दिएको छ।