मंसिर २२, २०८२ काठमाडौं— भक्तपुरको नलिञ्चोक हेलिपोर्ट निर्माणमा १३ करोड ५७ लाख रुपैयाँ भ्रष्टाचार गरेको आरोपमा निलम्बित नागरिक उड्डयन प्राधिकरण (क्यान) का महानिर्देशक प्रदीप अधिकारी थुनामा परेका छन्।

अख्तियार दुरुपयोग अनुसन्धान आयोगले बुधबार उनलाई पक्राउ गरी विशेष अदालतमा मुद्दा दर्ता गरेको थियो। आइतबार विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको इजलासले उनलाई पुर्पक्षका लागि थुनामा पठाउने आदेश दिए। यसै क्रममा अधिकारी डिल्लीबजार कारागारमा थुनामा राखिएका छन्।

यता, अधिकारीविरुद्ध हालै अख्तियारले दर्ता गरेको पोखरा अन्तर्राष्ट्रिय विमानस्थलको भ्रष्टाचार काण्डमा पनि मुद्दा चलिरहेको छ।