मंसिर २, २०८२ काठमाडौं— गएराति पक्राउ परेका मेडिकल व्यवसायी तथा राजसंस्था–हिन्दुराष्ट्र पुनर्स्थापना अभियानका अगुवा दुर्गा प्रसाईंलाई ४ दिनसम्म हिरासतमा राखेर अनुसन्धान गर्न जिल्ला प्रशासन कार्यालय काठमाडौँले अनुमति दिएको छ।

सार्वजनिक शान्तिविरुद्धको कसुरमा प्रहरीले अनुसन्धान अघि बढाइरहेको छ। म्याद थपका लागि मंगलबार प्रसाईंलाई जिल्ला सरकारी वकिलको कार्यालय हुँदै प्रशासन कार्यालय लगिएको थियो। त्यहाँ उनले आफूलाई कुन मुद्दामा पक्राउ गरिएको भन्नेबारे जानकारी नदिइएको दाबी गरेका हुन्।

प्रसाईंले हालै भड्काउपूर्ण अभिव्यक्ति दिएका कारण सार्वजनिक शान्ति भङ्ग गरेको आरोपमा प्रहरीले उनलाई पक्राउ गरेको थियो। प्रसाईंको गिरफ्तारीको विरोधमा उनका समर्थकहरूले प्रशासन कार्यालय अगाडि नाराबाजी गर्दै प्रदर्शन गरेका थिए।