काठमाडौँ । डाइभर्ट हुनुपर्ने अवस्थामा नेपाल वायुसेवा निगमका जहाज गौतमबुद्ध अन्तर्राष्ट्रिय विमानस्थलको प्रयोग गरिने भएको छ। 

नेपाल एयरलाइन्सले आफ्नो जहाज डाइभर्ट हुनुपर्ने अवस्थामा अबदेखि भारतको विमानस्थलका सट्टा गौतमबुद्ध अन्तर्राष्ट्रिय विमानस्थलको प्रयोग गर्न लागेको हो। निगमले मंसिर ३ गतेदेखि लागू हुने गरी भैरहवालाई वैकल्पिक विमानस्थलका रूपमा प्रयोग गर्ने निर्णय गरेको छ। 

त्रिभुवन अन्तर्राष्ट्रिय विमानस्थल (टीआईए)मा मौसम, भिडभाड वा अन्य कारणले अवतरण असम्भव हुने घटनामा जहाज भारततर्फ डाइभर्ट हुँदै आएकोमा अब भैरहवा प्रयोग गर्दा उल्लेखनीय खर्च कटौती, उडान समय बचत र थप सञ्चालनगत सहजता मिल्ने निगमको विश्वास छ।