श्रावण ९,२०८२ काठमाडौं ।  प्रधानमन्त्री केपी शर्मा ओली आज खडेरीको चपेटामा परेको मधेश प्रदेशको दौडामा जाँदै छन्। उनले महोत्तरी र बारा जिल्लामा आयोजना गरिएका कार्यक्रममा सहभागी हुनेछन्।

ओलीले सामाजिक सञ्जालमार्फत् जानकारी दिँदै तराई-मधेशमा परेको सुक्खाले किसानहरू प्रभावित भएको जनाएका छन्। उनले लेखेका छन्, “धान रोपाइँ हुन नसकेको अवस्थामा स्थानीयको पीडा बुझ्न महोत्तरी र बाराका दाजुभाइ-दिदीबहिनीहरूसँग भेट्न लागिएको हो।”

लामो समयदेखि वर्षा नहुँदा तराईका इनार, ट्युबेल सुक्दै गएका छन् भने धान रोप्न नसक्दा अन्न उत्पादन घट्ने चिन्ता बढेको छ। यसैबीच, साउन ७ गते बसेको मन्त्रिपरिषद् बैठकले मधेश प्रदेशका आठ जिल्लालाई तीन महिनाका लागि विपद् संकटग्रस्त क्षेत्र घोषणा गरिसकेको छ।