काठमाडौं । अर्थमन्त्री विष्णुप्रसाद पौडेलले धितोपत्र बोर्डलाई दबाब र प्रभावबाट सचेत रहँदै सेयर बजारको विकासमा लाग्न निर्देशन दिएका छन्। आइतबार धितोपत्र बोर्डको ३३औं वार्षिकोत्सवको अवसरमा बोल्दै मन्त्री पौडेलले भित्री कारोबार (इनसाइडर ट्रेडिङ) गर्नेहरूमाथि कारबाही गर्न निर्देशन दिएका छन्।

उनले भने, “गल्ती गर्नेहरूलाई दण्डित गर्नुपर्छ, राम्रो काम गर्नेहरूलाई प्रोत्साहन गर्नुपर्छ। बोर्डलाई दबाब दिन खोज्ने धेरै छन्, तिनबाट सचेत रहनुपर्छ।”

पुँजी बजारको दिगो विकासका लागि नियमन मजबुत बनाउनु पर्नेमा उनले जोड दिए। साथै, सेयर बजारमा नयाँ उपकरण तथा संरचना ल्याउनुपर्ने सुझाव पनि दिए। आगामी आर्थिक वर्षको बजेटबाट सरकार सेयर बजारको सुधार (रिफर्म) को अपेक्षामा रहेको समेत उनले उल्लेख गरे।