७ कार्तिक, २०७८ काठमाडौँ :  सिन्ह्वा,क्यानबेरा-अस्ट्रेलिया सरकारले आफ्ना नागरिक र अस्ट्रेलियामा स्थायी बसोबास गर्दै आएका बासिन्दाका अभिभावकका लागि यात्रा आवेदन खुला गरेको छ। कोभिडका कारण विदेशमा छुटेका आप्रवासीहरूका अभिभावकहरूलाई आवत जावत गर्नका लागि यस्तो व्यवस्था गरिएको हो।

सरकारले आफ्ना नागरिक र अस्ट्रेलियामा स्थायी बसोबास गर्दै आएका बासिन्दाका आमाबाबुलाई ‘निकट परिवार’ को परिभाषामा समावेश गरिने जनाएको गृह मन्त्रालयले शुक्रवार यात्रा छूट सूचना जारी गर्दै नोभेम्बर १ देखि देश यात्राको लागि आवेदन अनुमति सुरु गरेको हो।

अस्ट्रेलियाको कोभिड नियन्त्रणका लागि कडा सीमा प्रतिबन्ध अन्तर्गत नागरिक वा बासिन्दाका नजिकका परिवारका सदस्यलाई मात्र देशभित्र प्रवेश गर्न अनुमति दिइएको छ। सुरुमा आमाबाबुलाई नजिकको परिवारको रूपमा लिइँदैनथ्यो तर यो छूटसम्बन्धी व्यवस्था नोभेम्बर १ देखि सुरु भएपछि उनीहरूलाई अस्ट्रेलिया प्रवेशमा सहजता मिलेको छ।

गृह मामिला मन्त्री करेन एन्ड्रौजले यस परिवर्तनले महामारीद्वारा छुट्टिएका थुप्रै परिवारहरूलाई पुनर्मिलन गर्न अनुमति दिने कुरा बताए।

उनले भने, “विगत १८ महिनाभन्दा बढीदेखि विदेशमा आमाबाबु भएका थुप्रै परिवारले विवाह, अन्त्येष्टि, नातिनातिनाको जन्म र अन्य महत्त्वपूर्ण घटनाहरूमा संलग्न हुन पाएका छैनन्। यस अवधिमा तिनीहरूको धैर्य र त्यागको लागि म यी परिवारहरूलाई धन्यवाद दिन चाहन्छु।” परिवर्तन सँगसँगै अस्ट्रेलियाका नागरिक तथा स्थायी बासिन्दाका आमाबाबु अस्ट्रेलियामा पुनर्मिलन हुन सक्छन्स तिनीहरूले फेरि एक चोटि आफ्ना नातिनातिनालाई समातेर जीवनको महत्त्वपूर्ण उपलब्धि हासिल गर्न एक ठाउँमा भेला हुन सक्छन्।”

अस्ट्रेलियामा प्रवेश गर्न आवेदन दिने आमाबाबुले आफ्नो वयस्क बच्चाको नागरिकता वा निवासका साथै तिनीहरूको सम्बन्धको प्रमाण प्रदान गर्नुपर्नेछ। आवेदकहरूले कोभिड–१९ विरुद्ध पूर्ण खोप लगाएको हुनुपर्ने आइपुगेको राज्य वा इलाकाको क्वारेनटाइन प्रबन्धको अधीनमा रहनुपर्नेछ। शुक्रवार अस्ट्रेलियाले स्थानीय तवरमा प्राप्त दुई हजार ५०० भन्दा बढी नयाँ कोभिड सङ्क्रमणका घटना पुष्टि भएको र २१ जनाको मृत्यु भएको जनाएका छन्।

मेलबर्न ७७ दिनसम्म बन्द भएपछि यो नीति आउँदै छ। यो जूनदेखि पहिलो पटक कुनै पनि अस्ट्रेलियाली प्रमुख सहर बन्द नभएको सङ्केत हो। स्वास्थ्य विभागले हालै जारी गरेको तथ्याङ्क अनुसार अहिलेसम्म १६ वर्ष र त्यसभन्दा बढी उमेरका ८६.१ प्रतिशत अस्ट्रेलियालीहरूले एउटा कोरोनाभाइरस खोप लिइसकेका छन् भने ७१.७ प्रतिशतलाई पूर्ण खोप लगाइएको छ।