काठमाडौं ,नेपाल कम्युनिष्ट पार्टी (नेकपा) का नेता तथा सांसद भीम रावलले नेकपाको आन्तरिक मामिलाको सन्दर्भमा राष्ट्रपति पदको मर्यादा र गरिमा उल्लंघन भएको आरोप लगाएका छन् ।

राष्ट्रपति विद्यादेवी भण्डारीले पार्टीको आन्तरिक विवादमा आफ्नो भूमिका बढाइरहेको भन्दै विभिन्न टिप्पणी भइरहेका बेला उनले यस्तो आरोपसहितको टिप्पणी गरेका हुन् ।

‘नेकपाको आन्तरिक राजनीतिक समस्यामा कुनै एक पक्षलाई साथ दिंदै राष्ट्रपति सक्रिय रहनुभएको समाचार आइरहेको छ,’ नेता रावलले शुक्रबार ट्विटरमा लेखेका छन्, ‘यदि यस्तो गरिएको हो भने यो राष्ट्रपति पदको मर्यादा र गरिमाको उल्लंघन, स्थापित प्रणालीको अवज्ञा र नेकपाको संस्थागत सञ्चालनको मार्गमा अवरोध सिर्जना गर्ने गलत काम ठहरिने छ ।’

नेकपाका अध्यक्षद्वय केपी शर्मा ओली र पुष्पकमल दाहालबीच विवाद हुँदा गठित छ सदस्यीय कार्यदलमा रावल सदस्य थिए । कार्यदलले प्रतिवेदन बुझाएलगत्तै विवाद तत्काल साम्य भए पनि अहिले आएर दुवै अध्यक्षबीच पुनः विवाद उत्पन्न भएको छ ।

पार्टीनै संकटमा पर्ने गरी उत्पन्न पुनः विवादपछि राष्ट्रपतिले उपाध्यक्ष बामदेव गौतमलाई बोलाएर पार्टी एकताको पक्षमा उभिन आग्रह गरेका थिए । त्यस्तै गृहमन्त्री रामबहादुर थापा बादललाई पनि यस्तो आग्रह गरिएको थियो ।