भक्तपुर, भक्तपुरको चाँगुनारायण नगरपालिका वडा नं ५ तेलकोट जंगलमा कटुसको रुखमा एक महिला झुण्डिएर मृत्यु भएको अवस्थामा फेला परेकी छिन् । अन्दाजी ३० वर्ष जतिको देखिने गहुँगोरो, उचाई ५ फिट, मझौला शरिर भएकी महिला मृत अवस्थामा भेटिएकी हुन् ।

महानगरीय प्रहरी परिसर भक्तपुरका अनुसार छातिमा हरियो बुट्टा भएको रातो रङको कुर्था, हरियो सुरुवाल, रातो मखमलको जुत्ता, हरियो सल लगाएकी रातो ब्याग बोकेकी, घाँटीमा पोते लगाएकी हुलिया भएको मृत शव फेला परेको हो ।

घटनास्थल तथा शव जाँच प्रकृति मुचुल्का कार्य सम्पन्न गरी मृतकलाई पोष्टमार्टमको लागि भक्तपुर अस्पताल दुधापटी पठाई थप अनुसन्धान कार्य भईरहेको बताइएको छ । शव कसको हो कोही कसैलाई जानकारी भएमा महानगरीय प्रहरी परिसर, भक्तपुरमा सम्पर्कको लागि अनुरोध गरिएको छ ।