काठमाडौँ, नागार्जुन नगरपालिकाले लकडाउन कारण मजदुर र विपन्न वर्गका लागि प्रदान गरिने राहत सामाग्री एकद्वार प्रणालीबाट मात्र वितरण गर्ने निर्णय गरेको छ । कतिपय संघसंस्था र व्यक्तिले आफूखुसी राहत वितरण गरिएको जनगुनासो आएपछि नगरपालिकाले नगरपालिकाको स्वीकृत लिइ सम्बन्धित वडालाई राहत सामाग्री वितरण गर्नका लागि स्वीकृति दिने निर्णय गरेको हो ।

बिहिवार नगरप्रमुख मोहनबादुर बस्नेतको अध्यक्षतामा प्रतिनिधि र तथा प्रदेशसभाको सांसदहरुको उपस्थितिमा बसेको बैठकले एकद्वार प्रणालीबाट मात्र राहत सामाग्री वितरण गर्ने निर्णय गरिएको हो । नगपालिकाको वडा नं. १ स्थित न्यून आए भएका व्यक्तिहरु राख्नका लागि सहरी विकासको भवनमा ३० बेडको क्वारेनटाइन निर्माण गर्नका लागि वाग्मती प्रदेश सरकारसँग अनुरोध गर्ने निर्णय भएको नगर प्रमुख मोहनबहादुर बस्नेतले जानकारी बताउनुभयो ।

यस नगरपालिका भित्र भएको औषधी पसल बाहेक खाद्य सामाग्रीका पसलहरु बिहान ६ बजेदेखि १० बजेसम्म मात्र खोल्नका लागि अनुरोध गर्ने निर्णय भएको छ । राहत सामाग्री वितरण गर्न नेपाल सरकारको परिपत्र अनुसार मापदण्ड कायम गरी राहत वितरण गर्ने, राहत पाउने व्यक्तिहरुको नामावली दैनिकरुपमा सार्वजनिक गर्ने र सोको जानकारी नगरपालिकालाई गराउन सबै वडा कार्याललाई अनुरोध गर्ने निर्णय भएको नगरपालिकाका योजना तथा प्रशासन उपशाखाका प्रमुख नारायणप्रसाद तिमिल्सिनाले जानकारी दिनुभयो ।

नगर प्रमुख बस्नेतले कोरोना भाइरसबाट बच्नका लागि नियमितरुपमा साबुनपानीले २० सेकेण्डसम्म हात धुने, संभव भएसम्म स्यानिटाइजरको प्रयोग गर्ने, माक्स लगाउने, कम्तिमा एक मिटरको दुरी कायम गरी बस्न नगरबासीलाई आग्रह गर्नुभयो ।