काठमाडौं, निवर्तमान सञ्चार तथा सूचना प्रविधिमन्त्री गोकुल बाँस्कोटाले आफ्नो निर्माणधिन निवासमा भएको बम विस्फोनको घटनाबारे छानबिन हुनुपर्ने बताउनुभएको छ । बुधबार भक्तपुरको लोकन्थली मनोहरा फाँटस्थित घरमा कुकर बम विस्फोट भएको थियो । विस्फोटपछि बाँस्कोटाले छानबिन हुनुपर्ने बताएका हुन् ।

उहाँले सञ्चारकर्मीसँग कुरा गर्दै सबै विषयमा छानबिन हुनुपर्ने बताउँदै भन्नुभयो, ‘मैले सम्पूर्ण रुपमा सबै विषयहरुको छानबिन होस् भनेरै राजीनामा दिएको हो, अहिले यो सब कसले र किन गरिरहेको छ, म बढी बोल्दिनँ, यसमा मेरो केही प्रतिक्रिया छैन, सबै विषयको छानबिन हुनुपर्छ ।’

सेक्युरिटी प्रिन्टर खरिद प्रक्रियामा ७० करोड कमिसनको बार्गेनिङ गरेको अडियो रेकर्ड सार्वजनिक भएपछि बाँस्कोटाले गत फागुन ८ गते मन्त्री पदबाट राजीनामा दिनु भएको थियो ।