काठमाडौंः नेपाली कांग्रेस नेता तथा राष्ट्रियसभा सदस्य जितेन्द्र देवले एउटा पार्टी असफल हुँदैमा संसद र देश असफल हुन नसक्ने बताएका छन् ।

राष्ट्रिय सभाको शुक्रबारको बैठकमा देवले प्रतिनिधि सभा सरकार बनाउन असफल भएको अवस्थामा मात्र विघटन हुने दाबी गरेका हुन् ।

नेकपाभित्रको विवादले प्रतिनिधि सभा विघटन भएको चर्चा गर्दै देवले अल्पमतमा परेपछि राजीनामा दिन छाडेर प्रधानमन्त्री केपी ओलीले असंवैधानिक रुपमा प्रतिनिधि सभा विघटन गराएको बताए ।

उनले संघीय लोकतान्त्रिक गणतन्त्र धरापमा पर्ने लक्षण आकाशमा मडारिएको बताउँदै जनआन्दोलन, मधेस आन्दोलन, जनयुद्धलगायतका आन्दोलनको एकीकृत उपलब्धि संघीय लोकतान्त्रिक गणतन्त्र जोगाउन अग्रगमनकारी शक्ति एक ठाउँमा उभिनुपर्नेमा जोड दिए ।

असंवैधानिक तरिकाले प्रतिनिधि सभा विघटन गरिएको भन्दै देवले संघीयता र गणतन्त्रप्रति प्रधानमन्त्रीको धारणासमेत मागेका छन् ।