१५ असोज २०८३ काठमाडौं — कृषिमन्त्री गीता चौधरीले सामाजिक सञ्जालमा सार्वजनिक भएको विवादास्पद अडियो प्रकरणबारे स्पष्टीकरण दिएकी छन्। बिहीबार संघीय संसद्को कृषि तथा प्राकृतिक स्रोत समितिको बैठकमा सांसदहरूले अडियोबारे जवाफ मागेपछि मन्त्री चौधरीले अडियोमा कुराकानी गर्ने व्यक्तिहरूसँग आफ्नो कुनै व्यक्तिगत वा पारिवारिक सम्बन्ध नरहेको बताइन्।

यसअघि सार्वजनिक भएको उक्त अडियोमा दुई व्यक्तिले कृषिमन्त्री चौधरी, गृहमन्त्री सुधन गुरुङ र रास्वपा सांसद ठाकुरसिंह थारुको नाम लिँदै लेनदेनबारे कुराकानी गरेको सुनिएको थियो। अडियोमा बोल्ने एक व्यक्तिले मन्त्री चौधरीलाई आफ्नो ‘मामाकी छोरी’ भनेर चिनाएको दाबीसमेत गरिएको थियो।

मन्त्री चौधरीले भने अडियोमा बोल्ने व्यक्तिहरूसँग आफ्नो चिनजानसमेत नरहेको स्पष्ट पारिन्। उनले भनिन्, ‘अडियोमा बोल्ने मान्छेहरूसँग मेरो चिनजान छैन । व्यक्तिगत, पारिवारिक कुनै सम्बन्ध छैन।’ उनले उक्त विषय कानुनी प्रक्रियामा गइसकेको र अनुसन्धान जारी रहेकाले यसबारे थप बोल्न नमिल्ने बताइन्।

मन्त्री चौधरीले प्रमाण भए आफू त्यसको सामना गर्न तयार रहेको बताउँदै अनावश्यक टीकाटिप्पणीभन्दा प्रमाणका आधारमा विषय उठाउन आग्रह गरिन्।