हेटौंडा । बागमती प्रदेश सरकार गठनका लागि नेकपा (एमाले) का किरण थापामगरले दाबी पेस गरेका छन् । नेपालको संविधानको धारा १६८ को उपधारा २ बमोजिम सरकार गठनका लागि ६३ सांसदको समर्थनसहित थापाले प्रदेश प्रमुख दीपकप्रसाद देवकोटासमक्ष दाबी पेस गरेका हुन् ।

मुख्यमन्त्रीका लागि दाबी पेस गर्ने क्रममा थापाले एमालेका २५, नेकपाका २६ र राष्ट्रिय प्रजातन्त्र पार्टी (राप्रपा)का १२ गरी ६३ सांसदको समर्थन रहेको पत्र प्रदेश प्रमुखसमक्ष बुझाएका छन् ।

थापाको दाबी पेसका क्रममा एमालेका संसदीय दलका नेता जगन्नाथ थपलिया, राप्रपा नेता उद्धव थापा र नेकपा संसदीय दलका नेता शालिकराम जम्कट्टेलले समर्थन पत्रमा हस्ताक्षर गरेका छन् ।

६३ सांसदको समर्थनसहित दाबी पेस भएपछि प्रदेश प्रमुख देवकोटाले संविधानअनुसार मुख्यमन्त्री नियुक्तिको प्रक्रिया अघि बढाउनेछन् ।