३ भदौ २०८३ धनगढी- सुदूरपश्चिम प्रदेशका मुख्यमन्त्री खगराज भट्टले आज प्रदेशसभाबाट विश्वासको मत लिने भएका छन् । प्रदेशसभा सचिवालयका अनुसार आज दिउँसो १ बजे बस्ने प्रदेशसभा बैठकमा मुख्यमन्त्री भट्टले विश्वासको मत लिने कार्यसूची रहेको छ ।

विश्वासको मत लिएलगत्तै सरकारलाई पूर्णता दिने तयारीसमेत मुख्यमन्त्री भट्टले गरेका छन् । हाल नेकपा (एमाले)का तर्फबाट तीन मन्त्री र एक राज्यमन्त्री नियुक्त भइसकेका छन् । अब नेकपाका तर्फबाट तीन मन्त्री र दुई राज्यमन्त्री नियुक्त गर्ने तयारी रहेको जनाइएको छ ।

केन्द्रमा भएको सहमतिअनुसार नेकपा नेता भट्ट साउन २९ गते सुदूरपश्चिमको मुख्यमन्त्रीमा नियुक्त भएका थिए । प्रदेशसभामा नेकपा र एमालेको स्पष्ट बहुमत रहेको छ ।

५२ सदस्यीय सुदूरपश्चिम प्रदेशसभामा नेकपाका २२ र एमालेका ११ सांसद रहेका छन् ।